Carballo Interplay: os novos camiños dos contidos dixitais pasan pola Costa da Morte

“Podes vir descubrir series dixitais ou escoitar aos directivos ou directivas das plataformas que nos van contar cara a onde se encamiña o futuro dos contidos dixitais; podes vir para ver que pasa co audiovisual galego ou ver o concerto de Carlo Padial; ou podes coñecer como o petaron as redes de Operación Triunfo escoitando a Carolina Igrexas e Belena Gaynor”, explica Sonia Méndez, directora do Festival Carballo Interplay.

A principal vila da Costa da Morte acolle entre os días 4 e 7 de abril este evento que na súa quinta edición reivindica o papel das mulleres no desenvolvemento tecnolóxico e o audiovisual. Ademais dunha selección de webseries de todo o mundo, este festival “explora o talento e a creatividade na internet, atendendo ao seu uso como medio para a narración, o humor máis transgresor, a non-ficción, a cultura dixital ou a performance interactiva”, explican os seus organizadores.

“Fomos o primeiro festival específico de webseries, e conseguimos facer unha comunidade que vai máis aló das webseries e xera novos experimentos audiovisuais”, di Méndez que, a pesar do programa repleto de youtubers e instagramers cre que o público milenial non é o único interesado neste festival.

“Evidentemente eles están a construír dalgunha maneira a linguaxe que usamos: todo cambiou”, explica, pero pon como exemplo da aposta interxeracional a webserie gañadora do ano pasado na sección de webseries en galego, Teño unha horta en San Sadurniño, unha canle de Youtube na que as protagonistas comparten os seus coñecementos sobre o traballo no campo.Entre as novidades deste ano atópase a zona profesional, que ten como obxectivo poñer en contacto creadores e creadoras con plataformas, cun pequeno mercado, charlas e zona de networkig. 

CLAUSURA CON MULLERES TECNOLÓXICAS

“Tratamos a imaxe do festival con moito agarimo e queriamos usala para visibilizar mulleres pioneiras”, di Méndez sobre a cartelería do festival, que ten como protagonistas a Hedy Lamarr, precursora da tecnoloxía móbil, Ada Lovelace, matemática e escritora británica, Alice Guy, primeira persoa en dirixir unha película de ficción, Ángela Ruiz Carballos, inventora do e-book, Delia Derbyshire, pioneira da música electrónica, Margaret Hamilton, científica computacional, Radia Perlman, precursora da internet, Mary Allen Wilkes, enxeñeira programadora, Susan Kare, pioneira no deseño de interfaces de usuario e Agnès Varda, cineasta.

Ademais, este ano a gala de clausura do festival levará o título Mulleres e tecnoloxía: unha unión imposible?. Na gala, a actriz e clown Akira Valero fará un percorrido pola vida dalgunhas das mulleres que protagonizan o festival, utilizando o cabaret, o cuplé, o falso documental e a improvisación experimental.