Cine
Estrea en salas de 'Esquece Monelos'

O documental máis premiado do ano en Galicia chega este mes ás salas comerciais. Esquece Monelos, dirixido por Ángeles Huerta e producido por DangaDanga Audiovisuais, coa participación da CRTVG, proxectarase en cines de todo o país a partir do 27 de outubro. A película de non ficción, ópera prima de Huerta, recibiu tres galardóns na última edición dos Premios Mestre Mateo outorgados pola Academia do Audiovisual Galego: Mellor Documental, Mellor Montaxe (Sandra Sánchez) e Mellor Dirección de Fotografía (Jaime Pérez). Este ano tamén acadou a Mención Especial do Xurado no Festival Internacional de Documentais de Madrid, DocumentaMadrid, entre outros recoñecementos, e estivo presente na sección oficial de festivais como o FIDBA de Bos Aires ou o Festival Alcances.

Desde a súa preestrea o pasado 14 de decembro no Teatro Rosalía de Castro da Coruña, o documental proxectouse en diversos festivais e citas cinematográficas, pero será o venres 27 de outubro cando chegue ás salas comerciais. Esquece Monelos estrearase en A Coruña (Cantones Cines) e Santiago de Compostela (NUMAX) o vindeiro venres, día 27. O filme estará dispoñible na carteleira de ambas salas durante toda a semana. A continuación, desde a fin de semana do 3 de novembro, proxectarase nos Multicines Norte de Vigo e na Cineteca de Madrid. Mentres, en Barcelona, o público poderá ver por vez primeira o traballo de Huerta a partir do día 11 de novembro na sala Zumzeig.

Estas serán algunhas das citas coa gran pantalla dun traballo que, proximamente, se poderá ver noutras cidades como San Sebastián. A película emprega a desaparición do río Monelos baixo a cidade da Coruña para reflexionar sobre a perda da memoria dun lugar e das xentes que o habitaron. Un percorrido polo río que propicia unha viaxe pola vida de quen conta a súa historia. Un retrato colectivo que fala dos medos e inquedanzas que acompañan o paso do tempo. O traballo de Ángeles Huerta une dous modelos de documental aparentemente incompatibles. En canto á estrutura, xoga cun dispositivo argumental no cal os diferentes significados metafóricos dese río soterrado se lle desvelan ao espectador a medida que explora o espazo que hoxe ocupa o río (o real e o lembrado). Con todo, no seu ton trátase dun documental máis próximo á poesía ca ao ensaio. Deste xeito, Esquece Monelos pódese entender como un documental político, unha historia do desarrollismo e do consecuente pacto de silencio sobre a violencia dese proceso e sobre todo o que levou por diante, pero tamén como unha reflexión universal sobre a memoria e as súas trampas, como un discurso médico sobre o deterioro neuronal, ou simplemente como unha historia íntima e persoal do desamparo.