O Salto Galiza
Día 421: A coalición UPG-Más Madrid goberna Galiza

Levo máis dun ano sen escribir. Desde que Galiza se independizou os controis dos militares españois son máis habituais. Isto parece Hebrón, joder. Hoxe atopeime con dous, armados. E a cousa complicouse... Pero antes tedes que saber o que pasou este tempo. Se morro, se desaparezo, quero que se saiba a verdade.

Sei que me busca o goberno de España. Desde que Froilán declarou a Errejón Líder de España pecharon calquera comunicación e hai centos de desaparecidos cada día.

Cóntovos. O meu nome real é María Vázquez e traballo na AGE, a Axencia Galega de Espionaxe. É complexo, pero resumindo, son o último activo da misión “Lidia Senra” para conseguir a vacina contra o Covid-19.

Levo sete meses infiltrada como celadora no CHUS. Na AGE temos a certeza de que o equipo de Medtronic no Sergas posúe a vacina definitiva contra o Covid-19, barata e efectiva. O problema é que non a van vender ata que alguén pague 14 trillóns de escudos por ela (caeu o euro, definitivamente). Tamén aceptan CUC. Cuba salvou a millóns coa súa vacina, vendeuna e agora é referente do neocapitalismo. Os EEUU caeron e unificáronse na decimosexta provincia de Cuba, patrocinada por Ciego Montero.

Hoxe, como vos dicía, a misión complicouse. Pola mañá conseguín o documento de Medtronic coa fórmula da vacina. Estaba tan cerca... En canto o collín, marchei a toda hostia do CHUS, pero en Vidán, dous militares españoles mandáronme parar. Estaba moi nerviosa. Levaba os papeis de Medtronic ciscados no asento e soaba a Radio Pública Revolucionaria Galega. Rapidamente sospeitaron... Tremíanme as pernas... e non sei se actuei ben... o caso é que fixen a clásica de “teño o DNI na guantera”, collín a pistola e mateinos. Tris tras. Fácil. Pero agora búscanme. Estou jodida, e escribo isto á desesperada.

Polo demais, en Galiza non hai queixa. Feijóo pediu asilo político en Aranjuez e a coalición UPG-Más Madrid goberna con certo apoio social. Villares é un presidente carismático que está facendo fronte ao réxime de Errejón. Pontón foi declarada Raiña da República e ninguén a cuestiona.

Esta semana volverei a escribir. Se non, saúde e república.

Este conto enviouno Pablo. Envía o teu a osaltogaliza@gmail.com co asunto “Un Salto de Contos” ou como mensaxe á nosa páxina de Facebook.