Laboral
A CUT querélase contra Marlaska por permitir as manifestacións da ultradereita e prohibir a concentración do primeiro de maio

Hai conformidade no Tribunal Constitucional de que o estado de alarma non suspende dereitos, pero o Ministerio de Interior, nas mesmas condicións, “permitiu as manifestacións de Vox e denegou a nosa”, resume o avogado Brais González, da Central Unitaria de Traballadoras (CUT). O sindicato galego comunicara a convocatoria para manifestarse en coche contra a precarización o pasado primeiro de maio e foille prohibida, polo que hoxe presentaron no Tribunal Supremo unha querela criminal contra o ministro Fernando Grande-Marlaska e a subdelegada do Goberno en Pontevedra, Carmen Filomena, por tres presuntos delitos de prevaricación, denegación discriminatoria por razóns ideolóxicas e deliberado impedimento do dereito fundamental de reunión.

Así mesmo, esta semana tamén presentarán unha demanda no Tribunal Europeo de Dereitos Humanos, como continuación do litixio por mor da prohibición da manifestación por parte da Subdelegación de Pontevedra, que ratificou en sentenza o TSXG. Nesta demanda, a CUT segue defendendo o dereito a reunión e manifestación.

“Este comportamento administrativo responde os intereses electorais do Goberno de coalición, que mentres cualifica de disfuncional unha manifestación obreira, considera útil ás da ultradereita”

Sobre a querela do Supremo, a CUT considera que “este comportamento administrativo responde os intereses electorais do Goberno de coalición, que mentres cualifica de disfuncional e electoralmente prexudicial a celebración dunha manifestación obreira que denuncia as condicións de miseria e a cooperación do Goberno coa CEOE para políticas de exterminio do emprego e dos dereitos laborais, considera electoralmente útil aos seus intereses fomentar as manifestacións da ultradereita, co fin de presentar un xiro do Goberno do PSOE e Unidas Podemos cara á moderación cunha resposta responsábel”.

O sindicato galego lembra que “os dereitos fundamentais non son un dispositivo electoral, e non poden ser utilizados en función dos intereses do Goberno”. Esta central insiste que o dereito de manifestación non está suspendido no estado de alarma e que a prohibición das manifestacións do primeiro de maio tiña “un carácter meramente político que agora se está demostrando cando o Goberno deixa desfilar ás elites do fascismo español, que copiaron o modelo da caravana reivindicativa”.

Brais González Pérez

O Goberno, o Tribunal Constitucional e o labirinto da cidadanía obreira

Tribuna

Brais González Pérez

O Goberno, o Tribunal Constitucional e o labirinto da cidadanía obreira

As traballadoras coñecemos máis que ninguén a dureza e o drama do coronavirus. Como protesta naceu a proposta da caravana de vehículos o 1 de maio.