Poesía
O Salto Galiza estréase en Twitch e Youtube co programa “A Catapulta”

O Salto Galiza comeza a súa andaina nas plataformas Twitch e Youtube, complementando os contidos que xa se veñen realizando con regularidade desde El Salto. O programa co que nos estreamos nesta plataforma será “A Catapulta”, onde se realizarán entrevistas a autoras e autores poéticos en todas as súas variantes: poesía escrita ou poesía oral, autoras e autores musicais, etc.

Estas entrevistas terán o foco posto no seu labor artístico, nos seus procesos creativos, nas súas ferramentas, no seu xeito de organizarse e de tomar decisións, en como afrontan os diferentes problemas que se encontran no día a día... Conversas con autoras e autores, tanto literarios como musicais, sobre o labor da escrita, a súa forma de atacar os textos; pero tamén sobre como é o seu día a día na escrita, cando e por que escriben, como xestionan a súa obra, a súa relación co mundo editorial e coas lectoras. De xeito distendido, pero coa calma e desenvolvemento que cada punto precise. Tamén haberá oco para a actualidade e unha revisión da axenda de eventos poéticos mensuais.

A Catapulta” estará conducida polo poeta Samuel L. París que vai entrevistar a autoras e autores poéticos en todas as súas variantes

O programa nace da necesidade de saber sobre autoras e autores poéticos máis alá dos lanzamentos de publicacións ou recepcións de premios. É preciso coñecer mellor aquelas persoas que apostan por proxectos autoxestionados ou precarizados e as ferramentas que empregan, as súas propostas diferentes e diverxentes que, en moitas ocasións, abren camiño para quen vén detrás.

Ademais de poder seguir o programa en directo, puidendo interactuar durante a emisión a través do chat de Twitch e Youtube, cada episodio quedará dispoñible para revisión nestas dúas canles e tamén estará dispoñible en formato podcast posteriormente.

“A Catapulta” estará conducida polo poeta Samuel L. París. Como escritor, publicou en 2008 o “Manual da destrución” no Netlabel A Regueifa e en 2012 lanzou o poemario “Inflamable” en Edicións Positivas. En 2013 escribiu e publicou un poemario completo á semana no seu blog. Xa no 2015 publicou, baixo demanda, 25 poemarios con textos inéditos e exclusivos escritos integramente á man. En 2020 lanzou a “Internacional de Poesía Anarquista” (Edicións Positivas), unha antoloxía poética que recolle textos de 13 autores de todo o mundo.

Samuel L. París formou con Berto Álvarez o proxecto de podcasting Francamente Cariño, responsable de podcasts como MBA MAL ou Galicia El Podcast e tamén fixo parte da banda punk Terbutalina e da banda bluespunk Thee Blind Crows.