Investigación
Os restos dun foguete Soyuz ruso sobrevoan Galiza

As sete menos cuarto da mañá, numerosas persoas de diferentes puntos de Galiza eran testemuñas dunha visión que, para aquelas inexpertas parecería sacada dunha película de ciencia ficción. Unha estela, moi semellante a un meteorito, cruzaba os ceos galegos, permanecendo tanto tempo á vista que a moitas lles deu tempo a gravar vídeos de varios segundos de duración, como estes:

“Estabamos os compañeiros esperando para entrar a traballar en Navantia, en Ferrol, e vimos isto sobre as 6:30”
👉 Recibimos moitas mensaxes dun posible bólido ou meteorito cruzando os ceos de Galicia. Víchelo? pic.twitter.com/OKGSwlDg5j

— Galicia por Diante (@GxDRadioGalega) April 28, 2020

Meteoro sobre A Coruña pic.twitter.com/OHa6dNfYmA

— Israel Borja Nuñel Timiraos (@Canaan_1983) April 28, 2020

“Veuse no ceo o paso dunha luz moi potente e cunha longa estela que durou máis dun minuto, e moita xente, loxicamente, preguntouse de que se trataba, se era unha pedra cósmica, restos dun asteroide, ou algo que puidera ter entrado na atmosfera terrestre“, conta José Ángel Docobo, astrónomo e director do Observatorio Astronómico da USC. “Con todo, a duración do fenómeno digamos que xa descartaba bastante que se tratara dun fenómeno natural, porque normalmente os bólidos teñen unha duración moito máis curta. Entre cinco e oito segundos como moito aproximadamente”.

Así, tras recibir os vídeos de persoas intrigadas por coñecer a natureza do avistamento, e comprobar que era máis longo do que un meteorito natural, os expertos concluíron que se trataba de algo diferente. “A duración deste suceso xa nos fixo pensar que probablemente se tratou da reentrada dun obxecto artificial, como así foi”, prosegue Docobo. “Finalmente confirmouse que se trata da reentrada dun foguete ruso, Soyuz que foi lanzado a semana pasada desde o cosmódromo de Baikonur en Kazaxistán, para levar carga á estación espacial internacional. Unha vez que este tipo de obxectos cumpren a súa misión finalmente pois quedan á deriva e o que fan é ir caendo cara á Terra. E caen describindo órbitas cada vez máis baixas. Ao chegar ás capas máis baixas da atmosfera, coa densidade que teñen, prodúcese a destrución do obxecto. E isto foi o que se puido ver esta madrugada en Galiza”.

Xa se vira algo semellante hai case 20 anos, en setembro do ano 2001.

Este fenómeno, aínda que segue chamando a atención polo seu impacto visual, non é único, e xa se vira algo semellante hai case 20 anos, en setembro do ano 2001. “Nese caso o obxecto levara unha traxectoria en sentido inverso porque entrara polas Rías Baixas e subira cara ao Cantábrico. Nese momento tamén causara moitísimo asombro a toda aquela xente que vira semellante espectáculo de noite”, explica Docobo.

A pesar de que, ao non estar acostumados, podemos vivir este tipo de sucesos con algo de alarma, en xeral este tipo de reentradas non supoñen ningún perigo porque, como conta Docobo, “normalmente se destrúe todo o material no paso pola atmosfera, e neste caso aínda máis, xa que ía cara ao océano. Pero probablemente destruíuse moito antes de chegar ao mar”.

“Quero seguir animando a que a xente siga mirando ao ceo e que mande as imaxes a centros de investigación” subliña o profesor Docobo.

Con todo, Docobo di que é moi importante que a xente siga mirando ao ceo e continúe e gravar imaxes de todos os fenómenos que consideren inexplicables. “Gustaríame agradecer á xente que tomou estas imaxes porque son unha chave para despois poder dar unha explicación científica do sucedido. Por iso quero seguir animando a que a xente siga mirando ao ceo, e se no futuro alguén ve algunha cousa que lle chame a atención, pois que a grave tamén e que mande as imaxes a centros de investigación”.