O Salto Galiza
Diferentes porque a nosa publicidade é diferente

Nesta web non te atoparás cunha sección auspiciada por un banco que desafiuza, anuncios de empresas que contaminan, que teñen sedes en paraísos fiscais ou que explotan ás persoas traballadoras. A independencia significa para O Salto non depender economicamente das empresas ás que queremos denunciar. Por iso non aceptamos publicidade das compañías que violan os dereitos humanos, sociais, ambientais, animais e laborais. Por iso, baseamos o noso financiamento nas subscricións, que achegan o 70% do noso orzamento, e na publicidade ética. Se compartes esta visión da comunicación, este é o teu medio.

Un dos alicerces do Salto, desde o seu nacemento en 2016, sempre foi a independencia económica como garantía de independencia editorial. Por iso, desde o principio decidimos que non aceptariamos cartos de calquera. Xeramos unha lista negra de anunciantes, onde os grandes bancos, as inmobiliarias, as empresas do Ibex 35 e as grandes multinacionais ocupaban un lugar privilexiado. Decidimos que non permitiriamos os contidos patrocinados nin a publicidade invasiva, especialmente a que se nutre dos datos e intereses dos usuarios. E marcamos un límite para garantir esta independencia: os ingresos por publicidade non poden superar o 20% do orzamento anual do medio.

Decidimos que non permitiriamos os contidos patrocinados nin a publicidade invasiva, especialmente a que se nutre dos datos e intereses dos usuarios

Nestes tres anos de vida, podemos sacar peito: cumprimos estas liñas vermellas. Todo grazas ás miles de persoas que deron o seu apoio ao proxecto, converténdose en socias. Sen as máis de 7.200 persoas subscritas ao Salto, esta aposta pola independencia sería imposíbel.

O Salto vive das subscricións, que supoñen máis do 70% dos ingresos. Pero tamén da publicidade

O Salto vive das subscricións, que supoñen máis do 70% dos ingresos. Pero tamén da publicidade, que achega preto do 10% do orzamento. Unha cifra importante, pero que aínda pode crecer moito. Pero non queremos que sexa con calquera tipo de publicidade. Queremos ser altofalante e escaparate de entidades da economía social e solidaria, de organizacións que buscan a transformación social, de persoas que están a desenvolver proxectos sostíbeis, con outras iniciativas que, como O Salto, cren e traballan a diario por ese outro mundo posible.

Como podes axudar?

• Se aínda non estás subscrita/o, faite socio/a de O Salto. É a mellor forma de que este proxecto siga existindo e chegue cada vez a máis xente.
• Se xa estás subscrita/o, fala do Salto, recoméndao, regala unha subscrición a alguén que lle poida interesar.
• Comparte o noso contido, isto tamén axuda ás entidades que se publicitan connosco e afianza a nosa rede.
• Se formas parte dalgún colectivo ou empresa da economía social ou tes algún pequeno comercio que cumpre coas nosas liñas vermellas escríbenos a publicidad@elsaltodiario.com e axudámosche a mellorar a túa visibilidade. Anúnciate no Salto!