Elecciones
Así foi como che contamos a maioría absoluta do PP, o fracaso do PSOE e o fito histórico do BNG

A totalidade das mesas electorais de Galiza foron constituídas, segundo informa a Xunta e a primeira candidata en achegarse a votar ao seu colexio electoral foi Ana Pontón, a líder do Bloque Nacionalista Galego. “Hoxe Galiza pode facer historia”, defendeu a candidata á Presidencia ás portas do seu colexio en Santiago de Compostela. 

“Estou moi tranquila, moi contenta, moi ilusionada e moi orgullosa” de toda campaña electoral que levaron a cabo o seu partido e a súa militancia: “Unha campaña en positivo, de ideas, que creo que ilusionou a moitas persoas e que as reconciliou coa política”. Ana Pontón chamou a “esa mobilización masiva” necesaria para que “haxa cambio”: “Hoxe é o día no que a cidadanía ten o poder de decidir o futuro deste país nas súas mans”.

Todas as miradas están postas sobre Galiza este domingo. Probablemente, máis do que estivesen nos últimos 15 anos. Non só as que observan atentas desde o Estado español, senón tamén as dos case 2,7 millóns de electores e electoras que hoxe deciden, en parte, o seu futuro. Sempre o decidiron, non é que non houbese outras eleccións nos anteriores tres lustros.

Galiza decide o seu futuro: a esquerda soña mentres a dereita mira o reloxo

Javier H. Rodríguez

Elecciones

Eleccións Galiza decide o seu futuro: a esquerda soña mentres a dereita mira o reloxo

Javier H. Rodríguez

Preto de 2,7 millóns de galegos e galegas están chamados a votar este domingo tras a campaña máis rifada dos últimos 15 anos. O soberanismo e a esquerda pechan filas co BNG de Ana Pontón e o PP trata de conter unha sangría inesperada.

Pero iso cambiou a unha velocidade inalcanzable ata para o máis ávido dos spin doctors, sobre todo, para os que facturan nas rúas Ferraz e Génova. Unha nova pulsión social estalou tras o desastre ambiental dos pellets que axitou a memoria emocional dun pobo, na última década, asentado na desidia da imposibilidade de cambio, aínda que a dicir verdade o taboleiro xa pegara unha boa viraxe en abril de 2022.

Ler artigo completo aquí.

Varias monxas de procedencia relixiosa aínda non identificada foron pilladas por veciños de Vigo colocándolles a papeleta na man ás aforas do colexio electoral do barrio de San Roque a persoas maiores con apenas mobilidade. A imaxe foi capturada por veciños e veciñas que denunciaron publicamente os feitos.

Cazan monxas dun asilo en Vigo levando anciáns a votar coa papeleta na man

O Salto Galiza

Elecciones

Eleccións Cazan monxas dun asilo en Vigo levando anciáns a votar coa papeleta na man

O Salto Galiza

Varias monxas foron pilladas por veciños de Vigo no barrio de San Roque colocándolles a papeleta na man ás aforas do colexio electoral do Couto de San Honorato a persoas maiores con apenas mobilidade.

O primeiro avance de participación nas eleccións galegas deste 18F amosa dous puntos menos ca no ano 2020 ás mesmas horas. Arredor do 17% do censo electoral acudira xa aos colexios electorais ás 12h, cando na anterior ocasión a porcentaxe superaba o 19%. A participación a este hora é mellor, porén, ca a dos comicios do 2016.

Nas últimas eleccións, realizadas en plena pandemia, a participación acadou o 50%.

Besteiro, candidato do PSdeG sinalou: “Animo aos galegos e galegas a participar nun día histórico para o noso país. Teño moi boas vibracións. Participade, votade, que se escoite a vosa voz para que Galicia avance.”

A candidata de Sumar Galicia salientou no momento da votación que: “Temos que encher as urnas de ilusión e alegría para abrir unha nova etapa transformadora e valente.”

Armando Ojeda de Democracia Ourensana declarou logo de votar: “Agardamos ser determinantes no Parlamento de Galicia para revertir a situación de discriminación da provincia de Ourense que vimos denunciando dende hai anos.”

Díaz-Mella logo de votar declarou en perfecto castelán: “Damos las gracias a todos los apoderados por velar por unas elecciones limpias y transparentes, y a las Fuerzas y Cuerpos de Seguridad del Estado por su labor”.

Durante a xornada electoral deste domingo, varias monxas e persoas sen identificar foron capturadas polas cámaras levando a votar a anciáns e anciás internas en dous asilos das localidades de Cambados (Pontevedra) e Lugo.

Cachan a monxas e persoas sen identificar levando anciáns internos a votar en Cambados e Lugo

O Salto Galiza

Elecciones

Eleccións Cachan a monxas e persoas sen identificar levando anciáns internos a votar en Cambados e Lugo

O Salto Galiza

As dúas situacións de posible 'carretaxe' foron documentadas no asilo das Hermanitas de los Ancianos Desamparados en Lugo, que xa foi noticia polo mesmo nas pasadas eleccións xerais, e nun asilo de Cambados (Pontevedra).

Segundo relatan as persoas que documentaron graficamente esta escena, no asilo das Hermanitas de los Ancianos Desamparados de Lugo, na céntrica rúa San Roque, o tránsito de monxas e outras personas non identificadas levando anciáns e anciás a votar non parou durante as primeiras horas da xornada electoral.

Ademais de en Lugo foi documentado un caso semellante nun asilo de Cambados, nas Rías Baixas. Alí, segundo o relato das persoas que tiraron as fotografías, un par de coches estiveron realizando viaxes de ida e volta entre o asilo e os colexios electorais durante toda a mañá.

Desde O Salto Galiza documentamos os feitos cunha fotorreportaxe que pode consultarse aquí.

A participación ás 17h nas urnas galegas disparouse en 6,29 puntos con respecto ás eleccións de 2020, situándoa a esta hora nun 49,26% dos electores ou, o que é o mesmo, un total de 1.000.795 votos xa foron depositados en toda Galiza.

Se se toman de referencia as últimas tres convocatorias electorais tamén houbo cambios. Por exemplo, en 2020 acadou o 43%, mentres que en 2016 e 2012 se situou nun 42,5% en ambas ocasións. En contraste, nas eleccións de 2009, que foron as máis axustadas ata estas, a participación chegou ao 49,3%. Así mesmo, en 2005, ano en que se produciu a vitoria do bipartito conformado por PSdeG e BNG, a participación a este hora foi do 46,7%.

A participación ás 17h é a máis alta das últimas cinco eleccións galegas. Se atendemos aos datos por provincias aumenta máis en Lugo (7,86%) e Ourense (7,50%). Mentres que nas provincias atlánticas sobe de xeito máis moderado, na Coruña un 5,73% e un 5,74% en Pontevedra.

Segundo os datos das 17 horas medra a participación con respecto ás eleccións de 2016 e 2020. Lembremos que as de 2020 foron con pandemia, polo que colleremos os datos de 2016 para facer a comparación. Deste xeito en Vigo medrou con respecto a 2016 un 6,1%, mesma porcentaxe que na Coruña cidade. Pontevedra aumentou un 6,6%. Pola súa banda en Ourense é onde máis medra cun 8,1% respecto de 2016 e 10% respecto de 2020. En Lugo cidade a suba é do 7,8% e en Compostela un 7,3% respecto a 2016. En Oleiros (A Coruña) a subida é dun 8,5% respecto a 2016 e Narón un 6,7%; sendo menos acusada a subida en Vilagarcia e Ferrol cun 5,6% e 3,5% respectivamente.

As eleccións galegas do 18 de febreiro non conclúen completamente nesta noite electoral, xa que os votos dos cidadáns que sufragaron desde o estranxeiro se contarán a partir do 26 de febreiro, o que podería influír na distribución de escanos en xogo, e se alongará como máximo ata o día 29 do mesmo mes. É dicir, o resultado definitivo podería non saberse ata dentro de 11 días.

A eliminación do voto rogado, a diferenza de citas electorais anteriores, pode aumentar a participación dos electores exteriores, que representan aproximadamente o 18% do censo electoral de Galiza, con case medio millón de persoas. Isto marca unha diferenza significativa en comparación cos últimos comicios, onde o voto exterior diminuíra debido ás restricións do voto rogado impostas desde 2009.

O Partido Popular de Alfonso Rueda sería capaz de aguantar a maioría absoluta no Goberno galego, segundo a sondaxe a pé de urna realizada por GAD3 para a Televisión de Galicia. A enquisa, realizada durante a última semana, predí que o PP obtería entre 39 e 40 escanos, o Bloque Nacionalista Galego entre 25 e 26 deputados, o PSdeG caería ata 9 ou 10 e Democracia Ourensana podería entrar no Parlamento de Galicia.

Pola súa banda, Sondaxe outorga ao PP 39 escanos; ao BNG 25 e ao PSOE 11. Non outorga representación a ningunha outra forza política. O PP perdería, segundo esta enquisa, os tres deputados en Pontevedra, A Coruña e Lugo e o BNG gañaría dúas prazas na Coruña e outras dúas en Pontevedra, así como unha en Lugo e outra en Ourense, mentres que o PSOE perdería un escano pola Coruña, Ourense e Pontevedra.

Sumar Galicia denunciou a agresión dunha apoderada do Partido Popular a un apoderado da súa formación. O agredido xa presentou denuncia ante as autoridades pertinentes e está sendo atendido polo persoal do Álvaro Cunqueiro en Vigo.

Arredor das 12:45 deste domingo 18 de febreiro, unha apoderada do Partido Popular agrediu a un apoderado de Sumar Galicia na mesa de Balaídos, no distrito 4 de Vigo, segundo o partido de Marta Lois. Segundo testemuñas, a membro do PP atopábase dentro dunha das cabinas de votación, ocultando as papeletas doutros partidos. Foi entón cando Juan Valverde, o apoderado de Sumar, lle chamou a atención e a urxiu a abandonar a cabina. A apoderada do Partido Popular saíu finalmente da cabina e empurrou ao apoderado de Sumar Galicia, provocando que caese golpeando a súa cabeza contra unha mesa. Permaneceu inconsciente uns minutos.

Co 10% dos votos escrutados, o Partido Popular de Alfonso Rueda mantería a maioría absoluta no Goberno galego e 45 deputados. O Bloque Nacionalista Galego (BNG) rompería o seu teito electoral con 20 deputados e o PSdeG derrubaríase ata os 10 escanos. Aínda queda moita noite, moito voto por contar, especialmente nas cidades, historicamente progresistas, pero a tendencia apunta a que a dereita podería aguantar outros catro anos en San Caetano.

Co 30% dos votos escrutados, o PP revalidaría o Goberno en Galiza, aínda que o BNG vai gañando terreo a medida que avanza o conteo. Cos votos contados ata o momento, o PP obtería 42 escanos, o BNG 22, tres máis ca no 2020, e o PSOE 10, catro menos ca nas eleccións pasadas. Democracia Ourensana entra cun deputado.

Sumar, Podemos e Vox quedan lonxe polo de agora de obter representación.

Con máis do 50% do voto escrutado as malas noticias para Sumar e Podemos nas eleccións galegas son inocultables. A candidatura de Marta Lois obtén o 1,7% dos votos. E o partido de Isabel Faraldo apenas un 0,23%.

Co 60% do voto escrutado, o BNG segue avanzando posicións fronte ao PP, gañando un escano máis, neste caso pola Coruña. O BNG obtería 23 asentos no Parlamento galego, catro máis ca no 2020, e o PP baixa a 41, un menos ca nas anteriores eleccións, pero aínda con suficientes escanos para gobernar en solitario. O PSOE segue perdendo catro escanos con respecto a 2020, e quedaría con 10.

Co 71% de voto escrutado, o BNG arrebata outro escano ao PP, desta volta en Lugo, e queda con 24, cinco máis ca nas eleccións previas. O PP perde dous escanos con respecto a 2020 e queda en 40, dous por riba da maioría absoluta. A debacle do PSOE, que segue perdendo catro asentos, afastan as posibilidades de formar un goberno alternativo.

Os de Marta Lois quedan arredor do 2% do voto no conxunto de Galiza e Podemos non chega ao 0,5%. A esquerda estatal desaparece do mapa político galego.

O PSOE galego está a 107 votos de quitarlle un escano ao PP en Ourense co 97% escrutado.

O PSdeG protagonizou a súa peor elección en décadas cunha porcentaxe de voto do 14% e apenas 9 escanos, cinco menos ca no 2020.