CRTVG - Corporación Radio y Televisión de Galicia
A Xunta de Feijóo pagou sete millóns en dous anos polo Land Rober, que hoxe entrevista a Alfonso Rueda

Entre os anos 2021 e 2022, a Xunta de Galiza, gobernada nesa época por Alberto Núñez Feijóo, gastou sete millóns de euros en subcontratar a produción do coñecido programa nocturno Land Rober. Este late é un de programas líderes de audiencia en Galiza e polo que se paseou en varias ocasións o líder do Partido Popular durante os seus 13 anos como presidente e no que, este xoves, arrinca unha sorte de precampaña o seu sucesor, Alfonso Rueda. Non así os seus adversarios e adversarias políticas no Parlamento de Galicia. Sen contar os acordos de 2023, que a Corporación Radio e Televisión de Galicia (CRTVG) aínda non publicou no seu portal de transparencia, entre 2021 e 2022 subscribiron un total de cinco contratos que, xuntos, suman 6.973.971 euros de diñeiro público.

Aínda que a información é pública, tamén é concisa. Trátase de cinco licitacións pechadas nas que a dirección da CRTVG, imputada recentemente por presunto acoso laboral e cuxas traballadoras levan 281 semanas en folga, solicita os servizos da produtora C.T.V. SA. Cada unha das licitacións compóñena 15 programas por un total de 1.394.794,28 euros. E o contrato repítese exactamente igual outras catro veces, aínda que a plataforma de transparencia da televisión pública galega non permite acceder ao contido pormenorizado dos servizos solicitados. Só a cantidade de capítulos e o montante final malia ser unha utilización millonaria de recursos públicos.

Un programa de humor cómodo para o entrevistado

As aparicións de figuras políticas en Land Rober son infrecuentes e, agás unha excepción, sempre foron vinculadas ao Partido Popular de Galiza. De feito, o director xeral da corporación pública e responsable último dos contidos que se emiten, Alfonso Sánchez Izquierdo, foi nomeado a dedo por Feijóo ás poucas semanas de converterse en presidente da Xunta en 2009. As aparicións do líder do PP e candidato frustrado da investidura á presidencia do Goberno sempre foron afables e en clave humorística. Como na imaxe que ilustra esta información, onde o galego chancea con ser un monarca da popular serie Xogo de Tronos. A aparición do herdeiro de Feijóo no cargo, Alfonso Rueda, parece seguir o mesmo camiño.

De feito, soamente a publicación dunha promoción do novo episodio na que o presentador, Roberto Vilar, finxe ser un Garda Civil benévolo con Rueda levantou rebumbio nas redes sociais, recibindo críticas dos seus rivais políticos e da sociedade civil. Até tal punto que o propio presentador volveu a publicar un sketch ridiculizando as críticas recibidas e suxerindo que tamén as recibe das persoas afíns ao Partido Popular.

Un programa que abafou a unha moza coa súa expareja

Xusto no período temporal ao que estes contratos se refiren, a mediados de 2021, á dirección de Land Rober pareceulle boa idea tratar de arrinconar a unha muller nova que non sabía que nada daquilo ía acontecer para que escoitase e perdoase á súa exparella, coa que rompera por vixiar o seu teléfono móbil, entre outras condutas controladoras. No propio capítulo, que non foi emitido en directo, senón que foi unha decisión premeditada da produtora a de emitilo en diferido e polo tanto supervisado, a vítima explicou como aquel home a distanciou da súa contorna e até lle fixo perder un traballo. De feito, a CRTVG decidiu non subilo á súa plataforma de streaming.

Os acontecementos suscitados entón xeraron unha serie de queixas. Dende a asociación Xornalistas Galegas, que expresou a súa firme condena catalogando o sucedido como un “atropelo” e unha “clara violación da intimidade dunha muller, así como unha banalización de comportamentos machistas”. Até o Comité Intercentros da CRTVG, que solicitou a eliminación do programa en cuestión, sinalando que non era en absoluto a primeira vez que presentaba “contidos machistas”.

Trala presión social unánime, a Corporación Radio e Televisión de Galicia (CRTVG) viuse na obriga de emitir un comunicado no que argumentou que non tiña coñecemento dos acontecementos que ían ter lugar no programa ata que se transmitiu, e expresou o seu “pesar” cara a muller afectada. Pola súa banda, a produtora C.T.V., que delega a dirección do show á empresa do propio Vilar, Destino Bergen, defendeuse dicindo que non tiña coñecemento do contido do programa ata que se emitiu. Máis de dous anos despois daquel acontecemento, non se depurou ningunha responsabilidade pública. Nin na CRTVG, nin en ningunha das dúas produtoras.