Navarra
Aroztegiko auzipetuentzako absoluzioa eskatu dute

196 lagunek manifestua sinatu dute Aroztegiko zazpi auzipetuei elkartasuna erakutsi eta zigorren absoluzioa aldarrikatzeko. Adierazi dute “herri batek eginiko desobedientzia zibila ezin dela kriminalizatu” eta auzipetuen zigorren deuseztapena eskatu dute. Datorren astean izango da epaiketa.

Sinatzaileen artean Eider Rodriguez, Fermin Muguruza, Anari Alberdi, Itziar Ituño, Uxue Alberdi, Malakias eta Xabier Montoia daude, besteak beste. Irakurketa Amets Aranguren abeslariak aurkeztu du Saioa Alkaiza bertsolaria eta Mikel Taberna idazlearekin batera, eta seinalatu dute jazarpen hauek aurrekari kezkagarria direla “adierazpen askatasun eta eskubide demokratikoei dagokienez”.

Orotara, 20 urteko kartzela zigorra eta 56.000 euroko isuna ezarri diete auziperatuei. Areago, proiektua Aroztegia Gelditu plataformako kideen erruz galarazi dela argudiatua, Palacio de Aroztegia S.M. enpresak 43 milioi euroko konpentsazioak eskatu dizkie Nafarroa eta Espainiako Gobernuei, “eta badakigu milioiak eskatu nahi dizkietela auzipetuei” gehitu dute. “Bizi osorako zigor ekonomikoa”, “makinen aitzinean eseri baziren ere”.

Manifestuko sinatzaileek adierazi dute “desobedientzia zibila ezin dela kriminalizatu”.

Makinen parean eseri ziren, funtsean, Baztango Lekaroz herrian abiatu nahi duten markoproiektua geldiarazteko. Hor eraiki nahi dituzte luxuzko hotela, golf zelaia eta 228 txalet. Plataformatik “espekulazioan oinarritutako proiektua” dela salatu dute hasieratik, “lurraren birkalifikazioa”n oinarritzen dena.

Azken aldian, lurraren defentsaren eta herri mugimenduen aurkako errepresioa nabaria da tokian toki. Ardura hori partekatu zuten otsailean Iruñean kalera atera ziren 18.000 lagunek. Aroztegikoa da Euskal Herriko kapitalaren azpiegituren oldarraldietako bat.