Opinión
Erreforma garaia eta hezkuntza sozialista

Gauden erreforma testuinguruan, ez da lan erraza hezkuntzaren egoerari perspektiba orokor batetik so egitea. Are zailagoa oraindik hezkuntzan konkretuki ematen ari diren aldaketa hauek lan erreformarekin edota jasaten ari garen bizitzaren garestitzearekin lotzea. Baina batzuk ezin dira besteak gabe ulertu, ezinbestekoa da erreformak gizartearen sakoneko prozesuekin lotzea. Unibertsitatean LOSU eta Bizikideitza Lege berriak ezartzen ari dira, Lanbide Heziketako Plana martxan da; Bigarren Hezkuntzan LOMLOE ezarri dute eta EAEn hezkuntza legea onartzeko bidean daude. Baina, zertara datoz erreforma hauek?

Hezkuntza elitizatzen ari da, eta langile klasea bertatik kanporatua izaten. Geroz eta zailago izanen du baldintza ekonomiko baxuko ikasle batek unibertsitatera sartzea, beharrezkoak egin diren klase partikularrak ordaintzea edota lana eta ikasketak bateratzeak dakarren estresari aurre egitea. Honek guztiak azal dezake %16ko eskola-porrot tasa, esaterako. Era berean, testuinguru honetan, Lanbide Heziketa gai nagusietako bat izan da hezkuntza arduradunen artean. LHn enpresek dirutza inbertitzea onartzen ari dira “ikasle orok ikasteko eskubidea izan dezan” justifikazioaren baitan. Noski, gizarte honetan azpiratua aurkitzen den subjektu horrentzat erakargarri egin dira Lanbide Heziketetako zikloak, zuzenean lan merkatura txertatzeko bide efektiboena baita. Baina zeren truke?

“Hezkuntza sistemak modernizatzeko beharra du, gizartean hezkuntza prozesuak betetzen dituen funtzioak efektibo izaten jarraitzeko, gauden krisialdi ekonomiko larriaren eta gizartearen polarizazio eta pobretze tendentzien aurrean”

Hezkuntza sistemak modernizatzeko beharra du, gizartean hezkuntza prozesuak betetzen dituen funtzioak efektibo izaten jarraitzeko, gauden krisialdi ekonomiko larriaren eta gizartearen polarizazio eta pobretze tendentzien aurrean. Hezkuntza sistemaren bidez, elementu kultural konkretu batzuk ezarri eta etorkizuneko langileria izango diren belaunaldietan erabilgarri diren jakintzak-gaiak potentziatu nahi dituzte; teknologia berrien erabilera, besteak beste. Erreformek zerbaiti erantzuten badiete, elite ekonomikoen mugimendu estrategikoei erantzuten diete. Horregatik, LOSUk enpresen esku-hartze handiagoa baimenduko du unibertsitateetan, LOMLOEk filosofia bezalako ikasgaiak alde batera utzi eta digitalizazio eta ekintzailetza bezalakoak ezarriko ditu, Bizikidetza Legeak jardun politikoaren aurkako errepresioa justifikatuko du eta LH Planak sistema duala ezarriko du ziklo guztietan, lanesku merke baten gaineko kontrol zuzena bermatuko duena.

Beraz, ez dezatela hitz politez errealitatea ezkutatu. Erreformak ez datoz segregazioari edota eskola-uzte tasa altuari irtenbidea emateko, are gehiago, horietan sakontzeko datoz. Egungo hezkuntza sistema pieza bat gehiago da gizarte kapitalistaren funtzionamenduan, eta makinaria osoa ari da egoera berri batera moldatzen. Ez dago prozesu horretaz salbu den esparrurik, ezta hezkuntza ere. Erreformek funtzio hori betetzen dute: zapalkuntzan oinarritzen den gizarte hau behar berrietara egokitzea eta, ondorioz, segregazioa zein miseria betikotzea.

“Erreformek funtzio hori betetzen dute: zapalkuntzan oinarritzen den gizarte hau behar berrietara egokitzea eta, ondorioz, segregazioa zein miseria betikotzea”

Aurreko astean Joan Subirats, unibertsitatetako ministroa, Euskal Herriko Unibertsitatean izan zen, garatzen ari diren LOSU legearen inguruko proposamenak EHUrekin zein unibertsitateko beste sektoreekin jorratzeko, ikasleekin besteak beste. Hezkuntza erabakien gaineko arbitrariotasuna geroz eta handiagoa den honetan, zertarako balio digu lege honen garapenean parte-hartzea? Ogi apurrak soilik jasoko baditugu, zertarako nahi dugu ikasleon ordezkaritza handiagoa eskatu?

Erreforma guzti horiek suposatzen duten iruzurra da seinalatu behar duguna. Etorkizun prekario eta iluna dugu ikasleok eta egungo hezkuntza sistema, zulo horretatik irtetzeko bidea baino, arazoaren parte da. Egunerokotasuneko erronkak gainditzen irakatsi eta kolektiboaren garapena helburu izango duen heziketa eredua da defendatu behar duguna: hezkuntza sistema sozialista. Putreek gure bizitzako lehen pausoetatik duten kontrola eta miseriara kondenatzen gaituen heziketa amaitzea urgentziazkoa da.

“Egunerokotasuneko erronkak gainditzen irakatsi eta kolektiboaren garapena helburu izango duen heziketa eredua da defendatu behar duguna: hezkuntza sistema sozialista”

Bide horretan, data garrantzitsua dugu datorren martxoaren 24a, ikasle greba deitu baitu Ikasle Abertzaleakek Hego Euskal Herri osoan, “hezkuntza erreformak gelditu” lemapean eta hezkuntza sistema sozialista baten alde. Pozgarria izanen da despolitizazioa eta akritikotasuna erroturik duten gazte belaunaldiak mobilizatzen ikustea, bizi dugun errealitatea salatzeaz gain, hezkuntza sistema berri bat aldarrikatzen.

El estudiantado se manifestará contra la reforma educativa

Redacción El Salto

Educación

Educación El estudiantado se manifestará contra la reforma educativa

Redacción El Salto

Los sindicatos Estudiantes en Movimiento y Frente de Estudiantes convocan una huelga general estudiantil el próximo 24 de marzo contra una reforma educativa que, consideran, beneficia a la empresa privada poniendo a su disposición “mano de obra estudiantil infrarremunerada”.