Vigo
Milleiros de persoas saen á rúa en Vigo na primeira das catro mobilizacións galegas pola vivenda

Varios milleiros de persoas percorreron as rúas da cidade de Vigo para reclamar medidas “reais e inmediatas” que limiten dunha vez por todas o mercado da vivenda: “A emerxencia habitacional atravésanos cada vez a máis persoas. Mozas e mozos, maiores e en moitas circunstancias vitais diferentes”, explica unha moza a O Salto, entre berros de “fóra rentistas dos nosos barrios”. Aínda que a punta de lanza foi o Sindicato de Inquilinas, a plataforma Alianza pola Vivenda, que aúna case a unha vintena de organizacións locais, foi o paraugas social que a arroupou.

A de Vigo foi a primeira das catro mobilizacións que haberá esta fin de semana en Galiza. As outras serán este sábado, 6 de xuño, en outras tres cidades. En Santiago de Compostela, a mobilización partirá ás 12h desde a Alameda. Á mesma hora celebrarase unha manifestación na Coruña, convocada pola Plataforma polo Dereito á Vivenda, que arrancará na praza de Ourense, fronte á Delegación do Goberno.

O nutrido grupo de activistas sinalou que os prezos desorbitados dos alugueiros son a principal causa do “empobrecemento da clase traballadora e unha barreira para acceder a unha vivenda”. Pero non só iso. Tamén sinalaron a falta de oferta de vivenda habitual, “fronte ás máis de 21.000 vivendas baleiras e o crecemento exponencial das vivendas de uso turístico que xa alcanzaron as máis de 2.200 ofertas reguladas (ao que hai que engadirlle as ilegais)”. “Isto é unha fórmula ultra especulativa que non só reduce a oferta e contribúe a aumentar o prezo, senón que tamén expulsa a veciñanza dos seus barrios”, denunciaron.

A plataforma Alianza pola Vivenda está composta por Amnistía Internacional, Árbore, Asociación Veciñal de Teis, CIG, Ecoloxistas Galiza Atlántica e Verde, Ecoloxistas en Acción, Emaús, Espazo Aberto Antimilitar, Foro Socioeducativo As Ninguéns, Movemento Galego pola Defensa das Pensións e os Servizos Públicos (Modepen), Oficina de Valores Non Inventariables, Plataforma Galega Vivenda Xa!, Sindicato Estudantil Fervenza, Sindicato de Inquilinas Vigo e Verdegaia.