València
A Xunta encarga un mapa de zonas inundables por 266.436 euros seis días despois da catástrofe en València

A Xunta de Galiza, gobernada polo PP de Alfonso Rueda, encargou este luns un mapa de zonas inundables na costa galega por 266.436 euros. Isto é, seis días despois do inicio da dina que arrasou amplas zonas de València e Castela-A Mancha e que, aínda este luns, segue mantendo poboacións illadas e sen apenas servizos. O Goberno galego, a través da entidade pública empresarial Augas de Galiza sacou un contrato para crear unha actualización da cartografía das zonas con potencial de ser asolagadas na demarcación Galiza Costa.

O anuncio do concurso foi publicado este mesmo luns no portal de Contratos Públicos de Galiza cunha ampla documentación na que o organismo dirixido por Roi Fernández Añón leva meses traballando, pero que decidiu facer pública cando o debate sobre as construcións en zonas inundables está no foco mediático. Ademais, o propio Ministerio para a Transición Ecolóxica e o Reto Demográfico de Teresa Ribeira ten xa unha cartografía baseada en predicións de modelos matemáticos que afinan eses trazados até a 500 anos vista.

A escenificación política do presidente galego foise armando durante esta fin de semana. A pasada madrugada, Alfonso Rueda e o conselleiro de Presidencia, Xustiza e Deportes, Diego Calvo, visitaron a sede da Axencia Galega de Emerxencias (Axega) na Estrada e a da Policía Autonómica en Santiago de Compostela para fotografarse cos e as profesionais que partiron desde Galiza cara a València xunto a medios materiais como camións ou bombas de auga.