Okupación
Violencia policial durante o desaloxo da Insumisa

Apenas cinco meses despois de anunciar publicamente o proxecto Naves do Metrosidero para tres das naves situadas nas instalacións da antiga Comandancia de Obras da Coruña —en desuso durante décadas, e nas que o Centro Social Ocupado e Autoxestionado A Insumisa desenvolvía as súas actividades desde novembro de 2016— o Concello da Marea Atlántica executou o desaloxo o mércores 23 de maio a primeira hora da mañá.

Case en paralelo aos primeiros avisos por parte de activistas e veciñas sobre a presenza policial no CSOA A Insumisa, o xornal La Opinión, que ten amosado nestes tres anos de goberno municipal unha boa sintonía co Concello, informaba de que “a policía local acababa de recuperar a Comandancia ao atopala baleira”. Esta información sería pouco despois desmentida por activistas da Insumisa por medio do seu avogado, Antonio Vázquez, afirmando que “o desaloxo”, non abandono voluntario como suxería o diario coruñés, “foi executado pola Policía Local de xeito irregular”: quince horas antes de que rematase o prazo e sen aviso á persoa á que lle foi notificada a orde de desaloxo.

Non fixo falla moito tempo para comprobar que as activistas do Centro Social tiñan a vontade de oporse á intervención policial. Foise congregando xente do propio espazo e de diferentes colectivos da cidade na porta do espazo ocupado. As activistas foron ocupando a estrada, mentres aumentaba a tensión coa policía, momento no que dúas persoas subiron ao tellado dunha das naves mentres o resto tentaba entrar novamente no Centro Social. A Policía Local cargou con dureza e varias persoas tiveron que ser intervidas por feridas na cabeza e outras contusións.

A partir dese momento a presenza policial aumenta considerablemente, e tamén o número de persoas que se van concentrando na porta do Centro Social. A rúa estivo pechada ao tráfico até as tres da tarde. Até as cinco a policía non permitiu dar auga e algo de comida ás dúas persoas que permanecían empoleiradas no tellado do Centro Social, a pesar das reiteradas peticións por parte das manifestantes. Baixo un sol e unha temperatura importantes, unha tensión que medraba por momentos derivada dunha presenza policial cada vez máis alta, os manifestantes mantivéronse na beirarrúa enfronte da antiga Comandancia até ben avanzada a tarde.

A asemblea do Centro Social, co apoio de diferentes colectivos sociais da cidade herculina, convocou unha concentración ás oito da tarde en repulsa polo desaloxo e en apoio ás dúas persoas que se mantiñan no inmoble. Ao comezo do acto e nada máis despregar unha pancarta e tentar ocupar a mediana diante da importante dotación policial, produciuse unha nova carga policial na que varias persoas resultaron feridas. Unha ambulancia de Urxencias estivo estacionada nas proximidades da ocupa, ao igual que pola mañá, atendendo as persoas contusionadas. Calcúlase que foron ao redor de vinte as persoas feridas con diversa gravidade: seis delas precisaron ser atendidas no hospital.

Por volta das once e media da noite, previa negociación por parte da asemblea da Insumisa, a través do seu avogado, cos mandos policiais, conseguiuse que as dúas persoas que se mantiveran por máis de doce horas resistindo no inmoble, puidesen saír sen ser retidas nin identificadas. Foi unha difícil xestión tendo en conta que desde as cinco da tarde o interior do inmoble foi intervido por operarios da empresa Transportes Hércules entre outras, por varias dotacións de policía e tamén por membros dunha coñecida empresa de seguridade.

A Marea Atlántica emitiu un comunicado no que lamenta a violencia acontecida ao longo da xornada, falando de “fracaso colectivo”. As ocupas, pola súa banda, fan un chamado a unha manifestación o sábado 26 de maio pola tarde, pendente de concretar polo momento o lugar e hora de dita convocatoria e sinalan ao Concello como responsable da situación, ao falar dunha vontade de negociación que, afirman, “nunca foi tal”. “Como se pode entender un diálogo onde a unha das partes se lle obriga como punto de partida a desintegrarse na outra, sen ningunha solución de continuidade nin recoñecemento como suxeito político?”, preguntábase unha manifestante.

Isto supón un antes e un despois na xa difícil relación entre Marea Atlántica e movementos sociais da cidade. Trátase do primeiro desaloxo que se dá nun Concello dos denominados “do cambio” onde é o propio Concello quen finalmente asume o desaloxo. Este pasou a ser o propietario do inmoble, despois do cambio de titularidade que hai uns meses negociou cos ministerios de Defensa e Fomento.