Ocupación israelí
Galiza érguese contra o xenocidio do pobo palestino

Decenas de miles de persoas por toda Galiza  concentráronse durante a tarde deste luns nas principais prazas do país para esixirlle a Israel que poña fin á ocupación de territorios palestinos e que cese os ataques indiscriminados contra a poboación civil bloqueada e cada día máis illada na Franxa de Gaza. Dezasete prazas que, malia a choiva xeralizada, berraron contra o que se está a constatar xa coma un xenocidio. Da Coruña a Vigo, de Pontevedra a Lugo, de Ourense a Ferrol e unha das máis abultadas, como xa aconteceu o pasado 12 de outubro, a de Santiago de Compostela. 

Convocadas en colaboración polas catro organizacións de referencia, Mar de Lumes, Galiza por Palestina, BDS e a Asociación Galaico Árabe Jenin, ademais das sete cidades galegas tamén houbo participación nos concellos da Estrada, A Guarda, Burela, Corcubión, Lalín, Monforte, Ponteareas, Pontedeume, Ribeira e, pola mañám en Vilar de Barrio.

A diferenza do que acontecera a semana pasada, preto de 5.000 persoas desbordaron a céntrica rúa do Príncipe en Vigo dende o carón da Farola ata a Porta do Sol cun grande lema como cabeceira e que tamén foi a principal consigna: “Galiza está co pobo palestino”. Ducias de cartaces e un manifesto que se poderían sintetizar nunha soa frase recurrente, mais que non caduca: “Dende o río ata o mar, Palestina vencerá”. E sinalando os responsable claros de occidente: “Europa patrocina, Israel asasina”

Na Coruña, máis de 500 persoas berraban “Non é unha gerra, é un xenocidio!” ou “Estado sionista, estado terrorista!” no Obelisco da  cidade. Case un milleiro de manifestantes amosaron a súa solidariedade co pobo Palestino e esixiron que o Estado israelí deteña a súa agresión en Gaza.

Compostela e Lugo

En Compostela, máis de 6000 persoas comezaron camiñar desde o Toural ata a Praza de Praterías. Ao berro de “Estado sinoísta, Estado terrorista” e “Palestina Liberdade”, miles de persoas amosaron o seu apoio á situación que está a vivir Gaza. Bashar, un rapaz palestino que leva dous meses en Compostela agradecía emocionado o fluxo de persoas que acudiran á manifestación. “Isto é moi importante”, comentaba. 

En Lugo, arredor de 500 persoas tamén berraron contra o “apartheid”. Puidéronse escoitar lemas como “o sionismo é o terrorismo” ou, como en tódalas prazas galegas: “Palestina vencerá”.