Altri
Altri contrata a empresa que avalou a navegabilidade do ‘Prestige’ para que respalde a súa celulosa

A multinacional portuguesa Altri non captou a mensaxe. Este luns, o xigante da celulosa defendeu o seu proxecto de fábrica en Palas de Rei (Lugo) cun novo “informe independente” que, segundo a compañía, certifica o cumprimento do principio europeo DNSH (non causar prexuízo significativo ao medio ambiente), quedando como único trámite pendente a autorización ambiental integrada da Xunta.

O documento, elaborado por Bureau Veritas Inspección e Testing, conclúe que o proxecto Gama é compatible cos seis obxectivos ambientais que marca a normativa comunitaria: mitigación e adaptación ao cambio climático, xestión de recursos hídricos, economía circular, control da contaminación e protección da biodiversidade. Entre as cifras que destaca a empresa figuran un aforro do 99% en emisións de gases de efecto invernadoiro na produción de lyocell, unha redución do 91% no consumo de auga respecto a procesos convencionais, e a autosuficiencia enerxética da planta grazas ao aproveitamento de subprodutos como o licor negro. Altri vincula esta validación ao selo STEP concedido en novembro pola axencia europea CINEA e á declaración de impacto ambiental favorable que xa obtivo da Xunta o ano pasado.

Con todo, a empresa obvia unha parte relevante da historia desa consultora e que a Plataforma Ulloa Viva encargouse de lembrarlles cunha crítica frontal, centrada sobre todo en quen asina o informe. O colectivo lembra que Bureau Veritas é a mesma certificadora que avalou a navegabilidade do Prestige ata 2006, e considera “unha provocación” e “unha broma de mal gusto” que unha empresa pagada pola propia Altri se presente como “validación independente”. Trazan ademais un paralelismo co ocorrido coa consultora Afry, que en 2019 considerara inviable instalar unha celulosa en calquera río galego e que despois, contratada por Altri, si deu o visto e prace á planta na Ulloa. Quen paga, manda.

En canto ao fondo do informe, a plataforma cualifícao de “absolutamente falso” no capítulo hídrico: fronte á “eficiencia” que reivindica Altri, denuncian que a fábrica pretende captar 46 millóns de litros diarios do encoro de Portodemouros e verter 30 millóns de litros ao río Ulla a 27 graos con 63 toneladas de químicos, o que arroxa —segundo os seus cálculos— un saldo negativo de 16 millóns de litros diarios. O colectivo pide á Xunta e ao seu presidente, Alfonso Rueda, que teñan presente “a memoria histórica” do Prestige á hora de resolver a autorización ambiental integrada.