Altri
Altri di que a súa exclusión da rede eléctrica é “política” tras negociar durante meses a súa celulosa con Feijóo

A multinacional portuguesa de produción de pasta de papel, Altri, dixo que é unha decisión “puramente política” a exclusión da planificación da rede eléctrica da macrocelulosa que proxecta para Palas de Rei (Lugo) e avisou de que non renunciará a empregar “todos os mecanismos de recurso administrativo ao seu alcance” para conseguir os seus obxectivos.

A través dun comunicado emitido por Greenfiber, a sociedade instrumental creada polo grupo portugués xunto coa galega Greenalia para promover a fábrica, a empresa sinalou que “non se recibiu comunicación oficial sobre a inclusión ou exclusión de 'Gama' [nome comercial da celulosa] en dita planificación”. “Cando se notifique a decisión, procederase a analizar detalladamente os argumentos técnico-económicos aplicados e estudiarase a posibilidade de presentar alegacións seguindo o curso administrativo habitual unha vez a planificación de rede se eleve a público”, engade.

En calquera caso, non se queda corta en descalificar a decisión do Goberno central: “De producirse a exclusión, todo apuntaría a que se está ante unha decisión puramente política, que non está baseada en criterios técnicos, como debería ser”, dando a entender que a creación dunha enorme fábrica de celulosa no corazón territorial de Galiza con todas as afeccións ecolóxicas que suporía é unha sorte de destino técnico.

Baixo a mesma retórica da multinacional papeleira, que segue facendo serios esforzos de propaganda na prensa galega, tamén tería sido técnica a negociación durante meses co Goberno galego do entón presidente da Xunta, Alberto Núñez Feijóo —presentaron xuntos o proxecto—; sería técnica a decisión de absorber 46 millóns de litros de auga ao día, devolvela ata tres graos por riba da temperatura media do río Ulla, expropriar as terras agrarias de veciños e veciñas da Ulloa, crear unha sociedade público-privada ad hoc e, por suposto, aspirar a recibir 250 millóns de euros de diñeiro público. Cara ao final do comunicado, o xiro discursivo torna sinuoso: “A potencial exclusión do proxecto da planificación eléctrica suporía obrigar ao territorio a renunciar a unha instalación que contribuiría á súa descarbonización”.