Coñece 'Oasis Monte Alto', a iniciativa colaborativa para transformar o barrio

O proxecto comunitario Oasis Monte Alto é unha iniciativa dirixida a “facer realidade un soño común”. O domingo 29 haberá un encontro de presentación desta iniciativa transformadora. Habitantes do barrio, comerciantes, colectivos sociais, artistas, estudantes e persoas curiosas están convidadas.

O obxectivo é dar a coñecer este proceso para “deseñar e poñer en marcha iniciativas colaborativas que melloren o entorno e as relacións a través dos propios talentos e recursos locais”, nunha orixinal sesión vermú que terá lugar na rúa Matadero 68 ás 11 horas.

As crianzas son benvidas á presentación de Oasis Monte Alto e contarán cun espazo e actividades. Tamén haberá petiscos musicais, empanada e vermú.

O ‘Xogo Oasis’

O ‘Xogo Oasis’ é unha ferramenta de mobilización comunitaria creada polo Instituto Elos en Brasil e implementada centos de veces en máis de 30 países por todo o mundo. Un grupo de 20 persoas xogadoras actúan de nexo entre o proceso participativo e o resto da veciñanza, mobilizando á comunidade e convidando a participar no proceso de recoñecer o potencial do barrio e así soñar, deseñar e poñer en marcha iniciativas colaborativas que melloren a contorna e as relacións a través dos propios talentos e recursos locais.

Despois da presentación, Oasis Monte Alto desenvolverase durante dúas fins de semana de novembro, e rematará coa posta en marcha da acción transformadora.