Xunta de Galicia
A Xunta e a Deputación de Pontevedra pagaron 140.000 euros a dedo á regata Juan Carlos I de Sanxenxo

O podio da décima edición da Regata Internacional Rei Juan Carlos I non o alcanzou ningún velerista. O trío no centro do palco conformárono o presidente da Xunta, Alfonso Rueda; o rei emérito, Juan Carlos de Borbón, e o presidente da Deputación de Pontevedra —tamén do Partido Popular—, Luís López Diéguez. A posición no pedestal é inversamente proporcional ao diñeiro público achegado por cada unha das institucións que representan. A Xunta de Rueda pagou 60.000 euros a través da Axencia de Turismo de Galicia e a Deputación, controlada tamén polo PP, pagou outros 81.818,18 euros desde Presidencia.

Ámbolos dous contratos, como ocorre sempre nestes casos, execútanse a través da modalidade de negociados sen publicidade. En esencia, a dedo, sen concurso público. Os dous coa mesma fin, pero cun pretexto lixeiramente distinto. O Goberno galego fáino como forma de “patrocinar o turismo de Galicia” e a Deputación como “patrocinio deportivo”. O resultado é a foto que ilustra este texto.

A capacidade de fiscalización de ambas as adxudicacións é case nula. Ningunha plataforma de transparencia permite o acceso aos pormenores dos acordos. Nin a da Xunta nin a do Estado español que canaliza as contratacións das 38 deputacións. Só se pode coñecer o concepto —escaso, dunha liña—, o organismo contratante e o adxudicatario: o Real Club Náutico de Sanxenxo, cidade de vacacións predilecta do monarca.

De feito, o director do club náutico é Pedro Campos Calvo-Sotelo —sobriño do expresidente co que comparte apelido—, un dos amigos máis fieis de Juan Carlos I e que ademais foi, durante os anos do exilio do monarca, o seu máis recorrente anfitrión. A prensa do corazón e as páxinas amarelas da xeneralista sempre destacan a súa hospedaxe nalgunha das propiedades de Campos na contorna de Sanxenxo.

O resto de patrocinadores privados ocultan o diñeiro achegado, pero son habituais das altas esferas galegas e españolas: Abanca, Quirón Prevención, Mahou, a revista ¡Hola!, a Fundación Talgo, El Corte Inglés ou Volvo son algúns dos máis importantes.