Ourense
O alcalde de Ourense, imputado por prevaricación ao compatibilizar o cargo coa súa televisión privada sen autorización

O rexedor ourensán Gonzalo Pérez Jácome enfróntase a unha imputación por un presunto delito continuado de prevaricación. A causa arrinca da súa negativa a solicitar ante o pleno municipal a compatibilidade entre a súa dedicación exclusiva como alcalde e a súa condición de propietario e máximo responsable de Auria TV, unha televisión local de carácter público, percibindo ao mesmo tempo o salario íntegro vinculado a ese réxime de dedicación.

Así o recolle o auto asinado por Leonardo Álvarez, titular do Xulgado de Primeira Instancia número 1 da Sección de Instrución do Tribunal de Instancia de Ourense, quen considera “evidente” a obrigación do alcalde de someter esa cuestión ao pleno, “sin que se admitan interpretaciones”.

A xuízo do maxistrado, “Gonzalo Pérez Jácome tenía que haber planteado ante el pleno del Ayuntamiento de Ourense la cuestión debatida para que el pleno valorase si se le reconoce o no se le reconoce la compatibilidad entre su cargo desempeñado en forma de dedicación exclusiva y la explotación de una televisión pública y local”.

Máis de 400.000 euros percibidos sen a preceptiva autorización

O xuíz detalla que Jácome leva exercendo a alcaldía desde o 15 de xuño de 2019 “en régimen de dedicación exclusiva sin haber interesado en ningún momento la compatibilidad de dicho cargo con las actividades profesionales que desarrolla al margen de su condición de alcalde”, e que durante ese tempo acumulou retribucións superiores aos 400.000 euros: 69.925,94 euros en 2020; 70.555,24 en 2021; 73.024,70 en 2022; 75.215,42 en 2023; 77.457,30 en 2024; e 66.699,96 en 2025, ata novembro dese ano, cando se recibiu a certificación xudicial.

O auto sublicña que o alcalde actuou “a sabiendas de la ilegalidad que ello supone y del perjuicio que conlleva para las arcas municipales cobrando un sueldo que en caso de no serle concedida la compatibilidad no tendría derecho a cobrar”.

O episodio da solicitude retirada

O maxistrado dedica especial atención ao que cualifica como “extraño comportamiento del señor alcalde”: no seu momento presentouse un escrito solicitando a compatibilidade que foi retirado xusto antes de que o pleno se pronunciase ao respecto. Para Álvarez, ese xesto “lleva a pensar que en ese momento el señor alcalde tenía plena conciencia de que no se le iba a reconocer la referida compatibilidad”.

O informe técnico, descartado

O xuíz tamén rexeita o informe técnico achegado pola defensa de Jácome, no que se argumentaba que o alcalde non tiña obrigación de pedir a compatibilidade. Álvarez considérao carente de “el más mínimo valor probatorio” porque non ten “la más mínima fundamentación económica o jurídica”. O propio autor do documento admitiu en sede xudicial que non consultou ningunha documentación relacionada co alcalde nin coas súas actividades, e que se limitou a recoller o que “de palabra” lle trasladou o rexedor.

En definitiva, o maxistrado conclúe que a conduta de Pérez Jácome é “totalmente contraria al contenido de la ley” 53/1983 e cualifica esa vulneración de “absolutamente grosera”, sinalando que o alcalde era “plenamente consciente de ello”.