Memoria histórica
O Goberno español recoñece como vítimas aos dous obreiros asasinados o 10 de marzo de 1972 en Ferrol

O Goberno central deu luz verde este martes a unha declaración institucional coa que expresa o seu recoñecemento e homenaxe a quen sufriron os feitos do 10 de marzo de 1972 en Ferrol. Aquel día, unha marcha de operarios do estaleiro da Empresa Nacional Bazán rematou en masacre tras a intervención salvaxe da Policía Armada, que deixou un saldo de dous traballadores mortos —Amador Rey e Daniel Niebla— e máis de cen persoas feridas, varias delas de consideración.

O documento, asinado conxuntamente polo ministro de Política Territorial e Memoria Democrática, Ángel Víctor Torres, e a ministra de Traballo e Economía Social, Yolanda Díaz, reprocha de xeito expreso o uso “desproporcionado” da forza por parte dos corpos policiais no marco da disputa laboral xurdida en torno ao V Convenio Colectivo de Bazán.

O texto pon en valor que aquela data se consolidou como un dos referentes históricos da loita obreira polas liberdades, e lembra que o primeiro congreso do Sindicato Nacional de CCOO de Galiza xa a instaurou en 1978 como Día da Clase Obreira Galega. A declaración tamén sinala que a represión que veu despois se estendeu a máis de cincuenta traballadores de empresas da zona, que foron multados, encarcerados ou procesados ante o Tribunal de Orde Pública no que se coñeceu como o proceso dos 23 de Ferrol.

Medio século de espera

Con este acordo, o Executivo “reitera a súa adhesión aos principios de verdade, xustiza, reparación e non repetición”, e defende que a memoria das vítimas forma parte do legado democrático compartido de Ferrol e do conxunto do país, así como do compromiso colectivo coa dignidade do traballo e a xustiza social.

O recoñecemento chega máis de cincuenta anos despois dos feitos, e prodúcese en paralelo á tramitación do expediente para outorgar a Ferrol o título de “cidade de memoria democrática”, en recoñecemento á súa traxectoria de resistencia e represión obreira.