Memoria histórica
A Casa Cornide segue o ronsel de Meirás: os Franco terán que abrila ao público

Durante a mañá deste venres, o Diario Oficial de Galicia (DOG) publicou un dos anuncios máis esperados dos últimos días en materia de memoria histórica: a declaración como Ben de Interese Cultural da Casa Cornide (A Coruña), propiedade da familia do ditador Francisco Franco, despois de que o Goberno galego aprobase o decreto que a antecede. Aos Franco complícaselles a estratexia de manter a privacidade do patrimonio que acumularon durante a Ditadura e agora ostentan. Neste caso, a esposa do ditador, Carmen Polo.

O Concello da Coruña busca recuperar o histórico inmoble por vías xudiciais. Por agora lograron seguir a senda do Pazo de Meirás e os descendentes de Franco estarán obrigados a abrir a Casa Cornide ao público polo menos catro días ao mes definidos con antelación e, polo menos, durante catro horas ao día. Ademais, no DOG, establécese ordenar a inscrición no rexistro de bens de interese cultural e comunicalo tamén á administración estatal para a súa correspondente anotación.

Durante os anos sesenta, Carmen Polo teimou en facerse co edificio do século XVIII de estilo barroco que hoxe preside a Cidade Vella da Coruña. O luxoso inmoble foi propiedade de José Andrés Cornide, un eixo fundamental para entender a ilustración de Galicia. Tras unha operación sobre a que axexan numerosas irregularidades aínda sen resolver, os Franco conseguiron facerse coa propiedade para compatibilizar as súas estancias na Galiza co Pazo de Meirás.

A declaración da Casa Cornide como BIC coloca baixo a máxima protección á histórica edificación, polo que os titulares, os netos de Franco, están obrigados por lei a conservala para evitar a súa deterioración. Ademais de a calquera cidadá, os herdeiros do ditador terán que facilitar as prospeccións de inspectoras, persoal investigador e ao persoal técnico da Administración que o solicite no marco das condicións legais establecidas.