Memoria histórica
O alumnado de tres institutos galegos recupera a memoria das mulleres durante o franquismo

O alumnado de tres institutos galegos participou nun proxecto de recuperación da memoria democrática centrado nas vivencias das mulleres durante a Guerra Civil e a ditadura franquista. A iniciativa, impulsada por Agareso, permitiu recompilar máis de medio cento de testemuños de persoas maiores de distintos concellos galegos.

No proxecto tomaron parte estudantes do IES Salvador de Madariaga, na Coruña; do IES A Rodeira, en Cangas; e do IES Eduardo Pondal, en Ponteceso. Durante varios meses, o alumnado investigou o contexto histórico da Guerra Civil e a ditadura antes de entrevistar a avós, avoas, veciños e veciñas que viviron aquela etapa ou recibiron o relato directo de quen a padeceu.

As máis de 50 entrevistas realizadas documentan aspectos cotiáns da vida durante o franquismo, como a fame, a educación, a infancia, os agochos utilizados polas persoas perseguidas polo réxime ou os castigos específicos sufridos polas mulleres, poñendo o foco nun ámbito historicamente menos documentado.

O resultado deste traballo plasmouse nunha serie de podcasts elaborados integramente polo alumnado e dispoñibles a través da canle de iVoox de Agareso. O obxectivo da iniciativa é contribuír a ampliar o coñecemento sobre este período histórico e preservar testemuños que axuden a comprender o impacto da ditadura na vida cotiá, especialmente desde a perspectiva feminina.

Ademais de xerar un arquivo sonoro para futuras consultas, o proxecto busca fomentar o diálogo entre xeracións e utilizar o coñecemento do pasado como ferramenta educativa para reflexionar sobre o presente e o futuro. A organización promotora tamén puxo a disposición dos medios os audios recompilados para facilitar a súa difusión.