Medios de comunicación
A Xunta destinou máis de 70.000 euros diarios a campañas en medios o mes que convocou eleccións

A Xunta repartiu, desde as semanas previas á convocatoria de eleccións, e a maiores dos plans de medios, un mínimo de 711.457 euros aos medios de comunicación afíns. Son datos obtidos polo Salto tras achar os contratos menores de cada Consellería, Secretarías Xerais e organismos públicos do Goberno galego.

En pouco máis de mes e medio, foron contraídos un mínimo de 105 contratos con contías que oscilan entre os 850 e os 18.000 euros e dos que non hai máis información que a publicada no portal da Xunta entre milleiros de contratos menores. Os obxectos dos mesmos son diversos: insercións publicitarias, contidos patrocinados, “accións divulgativas”, etc. Todos eles, contratos a dedo sen negociación pública acordados e asinados entre os grupos mediáticos e as diferentes Consellerías. Os beneficiados son, en case todos os casos, medios e grupos mediáticos afíns á Xunta. La Voz de Galicia é a cabeceira que máis cartos recibiu, con 156.309 euros. É dicir, máis de 3.000 euros ao día só nestes pequenos contratos.

O grupo Prensa Ibérica (Faro de Vigo, La Opinión de A Coruña, El Correo Gallego) recibiu neste tempo algo máis de 170.000 euros; La Región (a través de Outro SL) case 100.000 euros; o Grupo El Progreso, que inclúe o Diario de Pontevedra case 90.000 euros; e Editorial La Capital (que publica El Ideal Gallego) pouco máis de 60.000 euros.

Ademais, son significativos os 57.120 euros que se embolsou o medio español ABC e os 15.520 euros do medio de ultradereita Libertad Digital. Todas estas cifras, lembremos, só nun mes e medio e contando só os contratos menores, que non é o método principal que emprega o réxime da Xunta para manter financiados os medios de comunicación aliados.

A Xunta do PP repartiu dous millóns a dedo a medios amigos unha semana despois de convocar eleccións

Javier H. Rodríguez

Medios de comunicación

Medios de comunicación A Xunta do PP repartiu dous millóns a dedo a medios amigos unha semana despois de convocar eleccións

Javier H. Rodríguez

O Diario Oficial de Galicia recolleu o 29 de decembro o groso da adxudicación a La Voz de Galicia, Faro de Vigo, La Región e El Progreso, unha semana despois do anuncio electoral do presidente galego Alfonso Rueda.

A estratexia dos plans de medios

Cada Consellería ou organismo público adoita externalizar o groso da xestión da súa publicidade institucional. A través dun procedemento público, orzamentan e licitan esa tarefa —chamada plan de medios— á axencia de medios que presente mellor oferta ou que mellor se axuste aos seus intereses.

Excluíndo as licitacións que inclúen campañas para 2024 e sen contar as licitacións da elaboración de creatividades, a Xunta destinou, só para executar en 2023, 19,3 millóns de euros en campañas, “elaboración e produción de plans de medios” ou “servizos de axenda de noticias”, entre outros obxectos similares. É dicir, uns 50.000 euros diarios que axencias de medios como Reclam, Proximia Havas, Quattro, Avante, Canal Uno ou Indico reparten entre os medios de comunicación galegos seguindo as instrucións do Goberno galego.

Por outra banda, a Secretaría Xeral de Medios concede anualmente axudas a empresas xornalísticas e de radiofusión nas que, cada decembro, saen beneficiados principalmente os medios aliados antes mencionados. Na convocatoria de 2023, 1,97 millóns. Só entre estas axudas, plans de medios e campañas, a Xunta investiu máis de 21 millóns de euros en 2023. A esta cantidade súmanselle os contratos menores achados nesta investigación e acordados directamente entre as consellerías e os grupos mediáticos e que ascenden, como mínimo, a 711.457 euros nestas últimas semanas.

Non é posible saber a cantidade exacta total do reparto a medios, xa que as negociacións entre as axencias e os grupos mediáticos non son públicas e algúns dos obxectos dos contratos menores son confusos ou mesmo non son definidos na plataforma pública da Xunta. Con todo, tendo en conta os datos obtidos en decembro e sumados ao custo medio diario das licitacións, estímase a Xunta pagou en decembro e, como mínimo, unha media de 72.812 euros ao día en publicidade e contidos pagados.

O reparto a dedo, perfectamente legal

A Xunta de Feijóo adquriu en 2010 o compromiso de elaborar unha lei de publicidade institucional que segue sen existir. En 2014, a Asociación de Medios en Galego presentou no Parlamento Galego a súa proposta a través de AGE e o BNG, e que tamén recollía propostas do Colexio de Xornalistas de Galicia. Reclamaban “transparencia no reparto das axudas públicas e da publicidade aos medios de comunicación.” A maioría do PPdeG rexeitou a proposta.

A día de hoxe, nin Xunta, nin deputacións provinciais, nin grandes concellos galegos aceptan regular a publicidade institucional e continúan repartindo o diñeiro público sen transparencia e sen seguir criterios obxectivos de interese público. Tan só o Concello de Ames, en 2017, presentou unhas “bases orientadoras" para a contratación da súa publicidade institucional. Dito doutro xeito, segue sen haber ningunha regulación nin mecanismo de control ou monitorización dos acordos entre administracións, grupos mediáticos e axencias de medios. A compra de espazos publicitarios, espazos informativos e as motivacións que puidera haber detrás delas quedan en todos casos, sen revisión nin control de ningún tipo.