Gentrificación
‘Fóra’: Historias de xentrificación

F        Fóra é unha serie de vídeos que pretende poñer o foco nas consecuencias da xentrificación, dos abusos do turismo e dunha lóxica curtopracista pensada para satisfacer os dividendos económicos duns poucos que esquece a vida cotiá das persoas do común.

As cidades, vilas e barrios que sempre foron espazos de vida e comunidade convértense agora en contedores de materia prima: vivendas de familias que hoxe son pisos turísticos, ultramarinos que venden souvenirs ou mercerías onde elixir entre cen smothies diferentes. Baixo esta capa de progreso, é posible facer vida real? Ir ao pan, cortar o pelo, mercar a comida para a cea?

Hoxe, quen paga manda e decide a oferta e a demanda. Tanto é así que as pequenas empresas cada vez teñen máis difícil facer fronte ao alugueiro, nun contexto no que os grandes centros comerciais e a venda online gozan de privilexios imposibles para os pequenos empresarios e empresarias de toda vida. Un exemplo disto é Anxos, da Mercería Algui, ou Moha, hosteleiro afincado en Compostela desde hai anos.

Por outra banda, estudantes e familias son expulsadas dos centros das cidades cara barrios periféricos nos que tamén alí o custo de alugueres se multiplica. A xentrificación non afecta só a uns poucos, se non que agudiza a precariedade e perpetúa as necesidades dos que menos teñen, cebándose coa clase traballadora, viva onde viva.

Tamén estivemos en Porto vendo ata onde chega a especulación inmobiliaria e en Sanxenxo, onde un clube privado construiu un pantalán para iates de 12 metros nun espazo público que condenaba dous areais.

Facemos Fóra: Historias de xentrificación para coñecer estes efectos máis alá das cifras, máis alá das normativas municipais, máis alá da dialéctica. Preguntando a quen o vive.