Energías renovables
O Supremo admite o recurso do sector pesqueiro contra os plans de ordenación do espazo marítimo

A batalla social sobre a ordenación do espazo marítimo do Estado español e a súa influencia na creación de macroproxectos eólicos no litoral vén de dar un novo xiro. A Sala Terceira do Contencioso-Administrativo do Tribunal Supremo acaba de admitir a trámite o recurso co que a Plataforma en Defensa da Pesca e dos Ecosistemas Mariños pretende impugnar os Plans de Ordenación do Espazo Marítimo (POEM) que aprobou en febreiro por Real Decreto o Ministerio para a Transición Ecolóxica e o Reto Demográfico.

A mediados de abril, coñecíase a intención de que esta plataforma, que agrupa a todas as confrarías de pescadores e pescadoras desde as Rías Baixas até Iparralde, pretendía tratar de impugnar o Real Decreto do Goberno de España. Unha das primeiras solicitudes que esgrimen é a medida cautelar de suspensión do Real Decreto “ante os danos irreversibles que a súa posta en marcha podería provocar nos ecosistemas mariños”.

“É unha moi boa nova que admitan a trámite o recurso contra esta auténtica barbaridade contra a pesca e os ecosistemas”, celebra Torcuato Teixeira, portavoz do colectivo. “En breve, teremos o expediente administrativo e poderemos ver todas as eivas que ten. Tomáronse decisións políticas sen ter a mellor información científica”, denuncia o representante da Plataforma en Defensa da Pesca e dos Ecosistemas Mariños.

As confrarías de pescadores e pescadoras que, neste caso, gozan da simpatía de boa parte das organizacións ecoloxistas e sociedades científicas, xa advertiran de que utilizarían todas as vías posibles para pelexar polo que cren que é un “atentado contra a costa”. “Seguiremos esgotando as vías políticas e xudiciais”, di Teixeira. “Cremos que hai unha clara vulneración do principio de precaución e da normativa internacional que obriga a España a preservar o medio ambiente do que o litoral forma parte”, engade.

“Ese mapa fíxose de xeito evidente sobre os ditados de empresas enerxéticas como Iberdrola, Naturgy... Que do interese xeral saben pouco, pero que queren facer negocio cun ben de primeira necesidade como é a enerxía”, remata Torcuato Teixeira en nome da Plataforma en Defensa da Pesca e dos Ecosistemas Mariños.