Educación
A Xunta manobra para recortar varios postos no Conservatorio Superior de Música de Vigo

O Conservatorio Superior de Música de Vigo (CSM Vigo) afronta un recorte de persoal que, segundo os cálculos do propio profesorado, do alumnado e dos sindicatos, podería deixar pechado o centro máis do 40% do tempo no que hoxe permanece aberto. A última modificación da Relación de Postos de Traballo (RPT), aprobada pola Consellería de Cultura, Educación, Formación Profesional e Universidades, reduciría o horario das actuais 14 horas diarias a apenas 7, un tesoirazo que a comunidade educativa considera incompatible co funcionamento do único centro público de ensinanzas artísticas superiores de música do sur de Galicia.

Traducido á semana, o axuste eliminaría 30 das 70 horas de apertura actuais, con consecuencias directas sobre as clases, o estudo individual e a actividade cultural do centro, entre ela o Festival Nas Ondas. Quen máis notaría o tesoirazo sería o alumnado de piano e percusión: son instrumentos que a maioría non ten na casa, polo que dependen por completo das aulas do conservatorio para poder practicar.

Para a comunidade educativa, este axuste non é un caso illado, senón unha mostra máis dos recortes que arrastran desde hai tempo a educación e os servizos públicos galegos. A esa lectura súmase o malestar pola falta de interlocución: a delegada territorial da Xunta en Vigo, Ana Ortiz, rexeitou reunirse cos representantes do alumnado, un xesto que interpretan como reflexo do trato xeral da administración cara ás súas demandas.

O centro é o único de titularidade pública en ensinanzas artísticas superiores de música de toda a provincia de Pontevedra e unha referencia cultural para o sur de Galicia, cun papel que vai moito máis alá das aulas. Por iso, alumnado e profesorado sosteñen que recortar o seu persoal e o seu horario non só prexudica o conservatorio, senón que agranda o desequilibrio territorial que xa existe entre o norte e o sur do país en oferta cultural e educativa.

A comunidade educativa asegura que o sinal de alarma chegou xa en marzo, cando unha inspectora deixou caer de maneira informal a posibilidade de recortar o cadro de persoal, sen que despois chegase ningunha comunicación oficial ata o último momento. A este episodio engaden outra queixa de fondo: a Xunta nunca aclarou con claridade se o conservatorio debe rexerse polos criterios dun centro de secundaria, dun universitario ou dunha ensinanza artística específica, unha indefinición que, denuncian, condiciona directamente como se dimensionan o seu cadro de persoal e os seus recursos.

Para intentar frear a medida, o alumnado puxo en marcha unha recollida de sinaturas en Change.org e segue coordinándose con representantes do profesorado e organizacións sindicais. As súas peticións á Xunta son tres: que revise de inmediato a modificación da RPT, que abra un diálogo real coa comunidade educativa e que adopte as medidas necesarias para que o conservatorio siga funcionando con normalidade.

O Pleno de Vigo ponse do lado do conservatorio

O respaldo institucional ao centro chegou o 29 de xuño, cando o Pleno do Concello de Vigo debateu unha moción do Grupo Municipal Socialista a favor de manter íntegro o cadro de persoal do conservatorio. Na quenda de intervencións, o BNG definiu a amortización de prazas como “un grave exercicio de irresponsabilidade e unha perda irreparable de talento creativo”. O texto saíu adiante con 20 votos a favor e 5 abstencións, as do Partido Popular, artífice na Xunta da medida, un amplo respaldo que evidencia o consenso municipal arredor do centro.

A rúa, tomada a golpe de batuta

O malestar tamén se trasladou á rúa. O martes 14 de xullo, máis de trinta músicos do CSM Vigo saíron protestar instrumento en man baixo o lema “O conservatorio non é un gasto, é futuro”. A xornada arrincou con concertos simultáneos diante do Museo Marco, dunha tenda Zara, da estatua do Sireno e da praza da Princesa, e continuou cunha batucada e un pasarrúas desde a Farola de Urzaiz ata a praza da Estrela, onde o grupo pechou o acto diante da Delegación da Xunta coa lectura dun manifesto. 

O BNG carga contra a Xunta

O BNG de Vigo volveu esixir á Xunta que rectifique uns recortes que, ao seu xuízo, deixarán o conservatorio cun “colapso de horarios e a perda de horas de ensaio” para o seu alumnado. O seu portavoz, Xabier Pérez Igrexas, reprochoulle ao PP que intente “maquillar o desmantelamento que eles mesmos provocan con medidas insuficientes” e cualificou de “tomadura de pelo” os anuncios do Goberno galego, para o que a única saída pasa por recuperar “íntegro” o persoal do centro.