Contaminación
A Fiscalía abre dilixencias pola vertedura de millóns de microplásticos na costa galega

A Fiscalía Xeral do Estado, a través da súa unidade especializada en Medio Ambiente, iniciou investigacións sobre a vertedura de pélets de plástico nas costas galegas tras a vertedura descontrolada de millóns de microplásticos fronte a Viana do Castelo (Portugal), segundo adiantou a CadenaSER. Segundo fontes da Fiscalía consultadas polo Grupo Prisa, o 4 de xaneiro iniciouse un expediente para tratar de dilucidar unha potencial responsabilidade penal e a magnitude do desastre a nivel medioambiental. Tamén Asturias decidiu activar este mesmo luns o Plan Territorial de Continxencias por Contaminación Mariña Accidental do Principado de Asturias (Placampa) ante as primeiras chegadas de pélets ás súas costas.

A vertedura do buque de carga Toconao fronte ás costas galega e portuguesa fixo saltar todas as alarmas na ría de Muros e Noia, na provincia da Coruña. Trátase de millóns de peuqenos pélets de plástico que se empregan en boa parte das industrias convertidos principalmente en polietileno, polipropileno, poliestireno, cloruro de polivinilo e outros plásticos ou resinas sintéticas. Tras a presión social producida desde o pasado xoves, tanto o Goberno do Estado como a Xunta de Galicia anunciaron que activan un plan de emerxencia. As medidas de continxencia chegan case un mes despois dos primeiros indicios da vertedura, a pesar da contaminación á que se está expoñendo aos ecosistemas mariños galegos da zona.

Porén, o Goberno galego non planea elevar o nivel de emrxencia activado debido á chegada de pélets de plástico, polo menos ata contar con nova información, din. De feito, o presidente da Xunta, Alfonso Rueda, criticou “a falta de datos por parte do Goberno” e acusou á oposición de entrar en “modo electoral” desde o principio, levando a cabo unha “campaña descarada” sobre este tema. E ao outro lado da chamada, máis do mesmo: o ministro de Transportes, Óscar Puente, acusou á Xunta de Galicia de tratar de “escorrer o vulto” e de “non facer nada” desde o 13 de decembro, día no que veciños de Ribeira (A Coruña) albiscaron o primeiro saco de microplásticos na costa galega.