Cine
Donostiako Zinemaldi Alternatiboak “gogoeta kritikoa” sustatu nahi du

Donostiako Zinemaldi Alternatiboak (San Sebastian Insurrectionary Fandango Festival) ostiralean ekingo dio jaialdiaren 15. edizioari. “Zinemaren bidez gogoeta kritikoa sustatzeako” helburuarekin, hiriko mugimendu sozialak elkarlanean antolatutako proiekzioak egongo dira. “Gizarte-gai eta gatazka ezberdinei buruzko lanak ikusi eta hauek eztabaidan jarriko ditugu”, diote antolatzaileek. Proiekzioen gehiengoa gune autogestionatuetan eta kalean izango dira, “hiri neoliberal honetan, herritarron harreman-espazioak aldarrikatzeko, zinema bitarteko bezala komunitateak josteko eta kultura eraldaketa sozialerako tresna bezala erabiltzeko”.

Donostiako mugimendu sozialekin elkarlanean antolatutako proiekzioak izango dira, “bateko eta besteko borrokari ekarpena egiteko asmoz”. Horren adibide dira, besteak beste, Marruma Kulturalak, Herri Kurduaren Aldeko Donostiako ekimena, edo Añorga Kultur taldearekin elkarlanean antolatutako saioak.

Gainera, aurtengo edizioan bereziki bi elkarlan azpimarratzen ditu antolakuntzak. Alde batetik, EHUN mugimenduak, etxebizitzaren auziak sortzen dituen arazoak salatzeko, irailaren 22tik 24ra Antiguako Sert plazan egingo duen kanpaldia antolatu du, eta Zinemaldi Alternatiboa bertan egongo da irailak 23an Habitar la Utopía proiekzioarekin. “Gogoratu behar da, gainera, plaza horretako alokairu sozialeko 522 etxebizitza Black Stone funts putreari saldu dizkiola administrazio publikoak”, seinalatzen dute. 

“Hiri neoliberal honetan, herritarron harreman-espazioak aldarrikatu nahi dugu"

Bestetik, Manteo eta Zemoria parkeen “defentsan eta udal gobernuak bertan eraiki asmo duen Gastronomy Open Ecosystem (GOe) proiektuak eragingo duen berdeguneen suntsiketaren aurka”, Uliako Auzo Elkarteak abiatu duen “Zu gabe, parkeak kentzen dizkigute” dinamikarekin bat eginez, irailaren 29an Jainkoak ez dit barkatzen dokumentalaren proiekzioa antolatu dute.

2006an Parte Zaharreko Gazte Asanbladarekin batera lehenengo edizioa antolatu zutenetik, “erresistentzia eta disidentzia askotarikoen bozgorailu izatea bilatu du jaialdiak, zinema, gozamena, kritikotasuna eta aldarrikapena uztartuz”, antolatzaileek diotenez. Lehen festibalaren ostean, Zinemaldi Alternatiboa antolatu gabe geratu zen hiru urtez, 2010ean Groseko Kortxoenea gaztetxean berreskuratu zuten arte. “Bost urtez jaso gintuen Kortxoeneak, eta gaztetxeari omenaldia egiten dio ondorengo edizio guztietan egokitu izan dugun “+5” aipuak”, azaltzen dute. Izan ere, Zinemaldi Alternatiboak hiriko gune eta proiektu autogestionatuak lehenetsi ditu proiekzioak egiteko. Horrela jardun dute urtez urte, baina “Covid-19 birusaren agerraldiak egitasmoa egokitzera behartu gintuen arte”. 2021ean, esaterako, zinema kalera atera zuten. “Egitarau osoa kalean, aire librean programatu izana mugarria izan zen, aurrera begira aukera berri eta ederrak zabaldu genituelari”onartzen dute.

Egiatarau 

Irailak 22, LETAMAN gaztetxeko terrazan (Intxaurrondo): Salvador Seguí, historia de un anarcosindicalista. 

Irailak 23 Sert plazako AKANPADAn (Benta Berri): Habitar la utopia 

Irailak 25 Harrobi plazan (Añorga): Peregrino Modernoen oporrak. 

Irailak 27 EHUko ARKITEKTURA ESKOLAn: Citizen Jane. 

Irailak 28, TXANTXARREKA gaztetxeko terrazan (Antigua): Berfin. 

Irailak 29 MANTEOn (Gros): Jainkoak ez dit barkatzen. 

Irailak 80 MARRUMAn (Gros): Bi arnas.