Altri
Greenalia tenta desvincularse da celulosa de Altri trala denegación da conexión eléctrica

Comezan a sentirse os primeiros movementos empresariais despois do revés da denegación da conexión eléctrica á celulosa de Altri. Tralo 'non' do Ministerio para a Transición Ecolóxica e o Reto Demográfico á creación da subestación eléctrica para a planta e que deixa o seu futuro tremendo, Greenalia, presentada en todo momento por adeptos e detractores como empresa palanca da multinacional portuguesa, marca perfil propio: “Requirímoslles para que se absteñan de forma inmediata de utilizar a expresión 'Altri-Greenalia' ou calquera referencias a esta última como promotora en futuras publicacións relativas ao proxecto Gama”, reza un comunicado que a empresa estivo preparando nas últimas semanas na súa sede da Coruña e ao que tivo acceso O Salto.

O argumento é enrevesado, pero revela un xiro singular na estratexia de comunicación da multinacional galega. En efecto, Greenfiber, a sociedade instrumental coa que Altri aterrou en Galiza, nunca estivo participada por Greenalia directamente, aínda que ata agora lles conveu a simplificación empresarial. É Smarttia SL, a sociedade patrimonial de Manuel García Pardo, a que ten arredor dun cuarto das accións de Greenfiber e máis do 90% das accións de Greenalia.

Porén, trala denegación da subestación eléctrica e o falecemento de José María Castellano, segundo home forte e accionista minoritario en Greenalia, a empresa enerxética galega prepara unha estratexia de contención para a súa caída reputacional: “Existen outros accionistas cuxa actividade é allea ao proxecto desenvolvido a través de Greenfiber. Por iso, co propósito de manter a coherencia coa realidade deste proxecto e evitar deste xeito calquera confusión en relación coa súa propiedade, así como a potencial afectación aos accionistas adicionais e a actividade de Greenalia, instamos a todas as partes a referirse con precisión a Smarttia como a entidade responsable do investimento neste proxecto”.

Ademais, Greenalia, en cuxo consello de administración goza dun posto Beatriz Mato, exconselleira de Medio Ambiente e a primeira gran porta xiratoria dos gobernos de Alberto Núñez Feijóo na Xunta, lanzou unha ameaza xudicial contra quen volva a ousar vinculala coa celulosa que pretende arrasar o corazón territorial de Galiza: “Así mesmo, advertímoslles que, en caso contrario, tanto Greenalia como Smarttia procederán ao inicio de cantas actuacións legais os amparen en defensa dos seus dereitos e intereses”.