Xunta de Galicia
A Xunta recibe ao embaixador de Israel en funcións mentres Gaza agoniza ao bordo da fame

A vicepresidenta do Parlamento de Galicia, Elena Candia (PP), e o director xeral de Relacións Exteriores da Xunta, Jesús Gamallo, mantiveron este xoves un encontro con Dan Poraz, actual encargado de negocios da Embaixada de Israel en España e embaixador en funcións. Esta reunión prodúcese nun momento no que o pobo palestino en Gaza atópase ao bordo da peor fame da súa historia e sofre o enésimo bombardeo sobre poboación civil no marco dunha orde de evacuación masiva de Benjamín Netanyahu.

A escenificación de simpatía do Goberno de Alfonso Rueda co Estado sionista provocou unha oleada de críticas por parte do maior partido da oposición, o BNG, cuxa portavoz nacional, Ana Pontón, arremeteu contra o Partido Popular por recibir a un representante dun goberno que cualifica de xenocida.

Ademais, Dan Poraz asume temporalmente as funcións de embaixador, xa que o posto permanece vacante desde maio de 2024, cando Rodica Radian-Gordon foi chamada a consultas tras a decisión do Goberno español de recoñecer oficialmente ao Estado palestino.

Pontón, a través das súas redes sociais, expresou o seu rotundo rexeitamento, cualificando de “indigno e inhumano que o goberno do señor Rueda reciba ao embaixador en funcións do goberno xenocida de Israel na Xunta e no Parlamento”. E engade: “Esta é a verdadeira cara do PP, ao lado de quen practica o exterminio do pobo palestino en Gaza”.

O BNG solicitou explicacións ao Executivo autonómico, facendo fincapé no papel do Parlamento galego, onde presentará unha queixa formal. Os deputados da formación aseguran non ter sido informados desta visita con antelación, xa que non foi anunciada publicamente. Por iso, esixen ao PP que “deixe de amparar a un Estado que está violando os dereitos humanos máis elementais”.