CRTVG - Corporación Radio y Televisión de Galicia
A TVG oculta canto lle pagou a Esperanza Aguirre por saír nun dos seus programas en ‘prime time’

Unha masaxe nun balneario e uns viños de alta alcurnia nunha adega do Ribeiro son os mellores momentos da visita da expresidenta da Comunidade de Madrid, Esperanza Aguirre, a Galiza pagada e retransmitida en prime time pola Televisión de Galiza a través do seu programa A miña gran cidade. O episodio custoulle ao erario público 42.529,79 euros, pero a dirección da Corporación de Servizos Audiovisuais de Galiza (CSAG) di descoñecer o caché concreto que lle pagou a empresa Producciones Celta SL, unha produtora propiedade do Grupo Prensa Ibérica, empresa editora de Faro de Vigo,La Opinión de A Coruña e El Correo Gallego, que se encarga do programa.

Con todo, a Lei 9/2017 de Contratos do Sector Público (LCSP) é extremadamente clara a este respecto. Nos seus artigos 100 e 102, explicita a potestade deste ou calquera ente público de acceder ao detalle dos desgloses de custos, a estrutura de gastos e as marxes da produción, sendo estes datos fundamentais para corroborar a adecuación ao mercado. Ademais, o artigo 62 da LCSP faculta á CSAG para controlar e supervisar a produción, podendo tamén esixir informes económicos, certificacións de custos e a xustificación de desviacións, como é natural.

Con todo, a dirección da Corporación de Servizos Audiovisuais de Galiza evade a pregunta de O Salto a este respecto: “A CSAG non mantén ningún tipo de relación contractual directa coas persoas invitadas aos programas nin establece acordos individuais de carácter económico con elas. En consecuencia, a Corporación non realiza pagamentos directos ás persoas participantes nos contidos producidos por empresas externas”.

E engade: “Calquera cuestión relativa á organización interna da produción ou ás condicións que, no seu caso, puidesen establecerse entre a produtora e as persoas invitadas forma parte do ámbito de xestión da empresa adxudicataria, sen intervención nin relación contractual directa por parte da CSAG”. Despréndese, entón, desta declaración que a invitación ao toureiro Jesulín de Ubrique, ao cantante Bertín Osborne e a histórica dirixente do PP madrileño foi decisión exclusiva da produtora.

A Televisión de Galiza segue afundíndose en audiencia

Cambiaron bastantes cousas na Televisión de Galiza desde 2023. Aquel ano, cun presidente da Xunta colocado a dedo polo saínte Feijóo, o ente público colleiteou o seu mellor dato de audiencia media anual da última década: un 11% de cota de pantalla, segundo Kantar Media. Con todo, entre finais dese mesmo ano e xaneiro deste, ocorreron varios feitos noticiosos cubertas mediáticas foron postas en tela de xuízo por boa parte da sociedade civil galega: o proxecto de macrocelulosa que Altri e o accionista maioritario de Greenalia pretenderon instalar en Palas de Rei; a contestación social que ese plan industrial produciu; a crise polo vertido de pellets na costa atlántica; ou as propias eleccións galegas.

Tras un xaneiro de coberturas cuestionadas a nivel xornalístico polos seus propios traballadores e ofertas de entretemento profundamente dereitivizadas no seu imaxinario, a TVG volveu asinar un mes de caída no que a audiencia se refire. Pecharon xaneiro de 2026, segundo Kantar Media, cun 8,3% de cota de pantalla media. É dicir, un punto decimal menos que a media de 2025.