O Salto Galiza
A Xunta envía SMS ao persoal sanitario de toda Galiza anunciando subas salariais a dous días das eleccións

A Xunta de Galiza, gobernada polo Partido Popular, acaba de enviar decenas de miles de SMS a todo o persoal sanitario de Galiza que traballa no Servizo Galego de Saúde anunciando subidas salariais a dous días das eleccións: “Melloras retributivas 2024: Abonaránselle a partir desta nómina o incremento das noites nos días laborables nun 7,9% e festivos e noite prefestiva de sábado do 15,71%. As noites de venres serán abonadas como festivas”, reza unha das mensaxes. Os receptores? Todos os médicos e médicas que fan algún tipo de garda no seu posto de traballo. A Xunta decidiu, a menos de 48 horas de que abran os colexios electorais, lembrarlles a todos eles as melloras salariais que conseguiron grazas ás protestas de abril de 2023, na antesala das eleccións municipais.

Pero non só a eles e elas. Hai máis mensaxes, variados e adaptados a cada posto de traballo. Todos enviados durante a mañá deste venres: “Informámoslle que a partir da nómina deste mes de febreiro seralle abonado mensualmente un novo grao de carreira profesional con atrasos desde xaneiro de 2024”, reza outro do SMS recibido por persoal facultativo. E a historia segue, tamén lles lembran as subidas netas das gardas: “Novos importes das gardas de presenza física: informámoslle que a partir desta nómina terán as seguintes contías: Gardas presencia física de 17 horas con 476€ e 672€ as de 24 horas, e a quinta garda sucesiva 629€ (17h) e 888€ (24h)”.

A nova estratexia da Xunta de Alfonso Rueda e a Consellería de Sanidade de Xulio García Comesaña chega apenas 24 horas despois de proceder a ingresarlle a miles de mariscadoras e mariscadores galegos unha subvención de 550 euros, tamén a escasas horas dos comicios.

Desde o colectivo Enfermeiras en Loita tacharon de falta de ética a estratexia do Partido Popular: “Anunciar subas salariais a falta de dous días para as eleccións autonómicas e enviar SMS masivos a todos os traballadores do Sergas pode ser legal pero eticamente reprobable. Este movemento xera en nós un enorme rexeitamento e quen sabe se non provocará xusto todo o contrario”.