Política
O PP ficha para as eleccións a unha empresaria que se adxudicou contratos da Xunta e outros gobernos afíns

Foi a primeira muller da historia en presidir o Círculo de Empresarios de Galiza en 2018. Naquela presentación arroupárona Josefina Fernández, fundadora das residencias xeriátricas DomusVi, cuxo posto abandonou asfixiada polas críticas á súa xestión de usuarios, familiares e partido políticos na pandemia, tras a morte dunhas 2.000 persoas nos seus centros; e Manuel Rodríguez, creador do Grupo Rodman, o xigante dos estaleiros que deu un envorco ao seu negocio grazas a contratos millonarios para construír lanchas patrulleiras para a Garda Civil.

Uns e outros enriqueceron as súas contas grazas a decenas de licitacións públicas, do mesmo xeito que o fixo a agora número dous por Pontevedra do Partido Popular para as eleccións galegas, Patricia García. Non podería ser o número uno porque diante vai o candidato e actual presidente, Alfonso Rueda. Así, confirmarase o salto de presidenta da patronal galega (deixou o posto en 2021 para unirse ao PP) a deputada no Parlamento de Galiza.

O CIS constata a caída en picado do PP en Galiza e déixao a piques de perder a maioría absoluta

O Salto Galiza

Elecciones

Eleccións galegas 18F O CIS constata a caída en picado do PP en Galiza e déixao a piques de perder a maioría absoluta

O Salto Galiza

O BNG de Ana Pontón segue en ascenso e perfílase como a opción favorita na esquerda para un potencial cambio que, a priori, sería a través dun goberno levantado polo PSdeG de José Ramón Gómez Besteiro e Sumar Galicia liderado por Marta Lois.

A información é pública, pero non especialmente accesible. E aínda que a empresaria Patricia García é popularmente coñecida polo cargo que ocupou como como xefa da patronal galega e como a fundadora da empresa de formación Femxa, segundo o Boletín Oficial do Rexistro Mercantil, a día de hoxe ostentaría cargos directivos en máis dunha vintena de grandes empresas con obxectos sociais moi diversos. Desde xestións de patrimonios inmobiliarios e promotoras para a construción e compra-venda de bens inmobles, até antigos cargos nalgúns dos grandes bancos do Estado español. Sen contar os que estritamente pertencen ao holding empresarial que controla: Green Smart Ventures. Algunhas das empresas deste armazón societario son Learning and Support Services, Followup & Control, Ideas Propias, Nred, Activa Formación, adquiro Servizos ou o propio Grupo Femxa.

É precisamente con estas sociedades coas que García accedeu a decenas de licitacións públicas repartidas polo Goberno do que con toda seguridade formará parte. Só desde o ano 2020 fíxose con tres contratos por valor de 354.580 euros a través de Femxa; outro catro contratos por valor de 483.115,5 con outra sociedade denominada Nred; outro contrato máis por valor de 44.460 euros coa empresa Activa Formación; e outro máis cunha contía total de 188.316 euros. Iso sen contar as decenas de licitacións a cargo de administracións gobernadas polo Partido Popular do que forma parte tanto na Comunidade de Madrid, a Junta de Castela e León, a Región de Murcia ou a Junta de Estremadura, que suman cifras millonarias nos últimos anos. Sen ir máis lonxe, a sociedade máis coñecida, Femxa, levou só en 2020 6,2 millóns de euros de adxudicacións públicas. Algunhas delas, de administracións tamén gobernadas polo Partido Socialista.