Política
O BNG forza unha comisión para investigar miles de contratos a dedo da Xunta con empresas afíns ao PP

A portavoz nacional e líder do Bloque Nacionalista Galego, Ana Pontón, anunciou este martes que o seu grupo utilizará os votos dos seus 25 deputados e deputadas para forzar unha comisión de investigación sobre os miles de contratos presuntamente irregulares da Xunta destapados polo Salto e Público durante o pasado curso político.

Coñecida como ‘bala de prata’, unha única vez por lexislatura, pódese abrir unha comisión de investigación se o solicita un terzo dos deputados e deputadas do Parlamento de Galiza que pertenzan a un mesmo grupo parlamentario, ou as dúas quintas partes dos parlamentarios.

O BNG decidiu comezar o curso político (e case a lexislatura) poñendo toda a súa forza na Cámara para esclarecer tanto os 1.311 contratos adxudicados sen concurso por un valor total de 4.832.029,85 a Eulen, empresa dirixida en Galiza pola irmá de Alberto Núñez Feijóo; as 1.034.964 licitacións a dedo por valor de 4.000 millóns repartidas en pouco máis dunha lexislatura; e os sobrecustos na construción e explotación externa de determinados servizos non médicos do hospital Álvaro Cunqueiro de Vigo.

“Adiántollo, digan o que digan hoxe, haberá comisión de investigación porque imos usar a forza dos nosos 25 deputados para sacar á a luz todo o que o PP quere esconder”, advertiu Pontón.

En todo caso, a nacionalista pediulle que “non veten” o traballo da comisión xa que a maioría parlamentaria coa que conta o PP no Pazo do Hórreo poderá determinar o calendario e as comparecencias das que se dota este órgano. Pontón cargou contra os de Rueda por vetar a comisión polo trámite ordinario demostrando, ao seu xuízo, que teñen medo “á transparencia” porque parece que queren esconder “que meten a man na carteira dos galegos para beneficiar a empresas amigas do PP”.

Insistiu en que o seu grupo pretende arroxar luz sobre uns feitos “gravísimos” e que “repugnan” á sociedade porque indican que mentres miles de persoas morrían, houbo quen “quixeron aproveitar unha pandemia para forrarse con contratos públicos, e o máis grave, houbo quen llo permitiu”.

O portavoz do PP no Parlamento galego, Alberto Pazos, acusou aos nacionalistas de trasladar a Galiza e a España o “sistema bolivariano de Nicolás Maduro“ para “enlamar” a política. Dixo aos representantes do BNG ”serven" aos intereses do PSOE e de Pedro Sánchez que son quen teñen interese en arroxar dúbidas sobre o “xefe da oposición”, Alberto Núñez Feijóo, para desviar a atención das “acumulacións escandalosas” de supostos casos de corrupción que acurralan, según el, á “contorna máis próxima” do presidente do Goberno.

Para o PP este é un paso máis na estratexia dunha oposición que leva “quince anos buscando desesperadamente un caso de corrupción” na Xunta polo que tamén dubidan sobre a eficiencia que terá unha investigación se eles xa “ditaminaron a culpabilidade” dos membros da Xunta.