Minería
As 16 preguntas que Steven Emerman trae a Galiza para cuestionar a mina de Doade

Ante a falta de información clara e transparente por parte da empresa mineira que pretende abrir unha mina no lugar de Doade, no concello ourensán de Beariz, a veciñanza organizouse para acudir a un experto internacional independente. Trátase do doutor Steven Emerman, experto en xeofísica con 31 años de experiencia e máis de 60 publicacións científicas que, ademais, traballou como consultor independente tanto para empresas mineiras como para organismos públicos. 

As veciñas e veciños están a tratar de prepararse para coñecer todos os potenciais perxuízos da primeira fase deste proxecto mineiro que, presumiblemente, será presentado antes de fin de ano. “Esta charla está organizada para afondar na afectación ambiental e en concreto nos efectos nas augas da zona. Farase con xente experta non ligada a intereses empresariais nin políticos co estudo da información que dispoñemos do anterior proxecto presentado“, explican as veciñas a esta redacción.

A empresa responsable, Recursos Minerales de Galicia, do Grupo Samca, din, non lles facilitou nin os estudos hidroxeolóxicos que realizou nin un avance do proxecto que presentará en decembro para solicitar o pase a Concesión de Explotación, ”por moito que presuman de transparencia”, denuncian. 

O dereito mineiro Alberta I tentou ser explotado hai catro anos pola empresa Recursos Minerales de Galicia. A Xunta de Galiza denegou entón a Concesión de Explotación ante o informe negativo da Confederación Hidrográfica Miño-Sil pola máis que probable afección aos cursos de auga da zona. Ademais, dito proxecto, fora presentado sen someterse ao trámite de Avaliación de Impacto Ambiental (AIA) a pesar de cumprir as tres condicións para pasar ese proceso.

Que a súa paraxénese poida, por oxidación, hidratación ou disolución, producir augas acedas ou alcalinas que dean lugar a cambios no pH ou liberen iones metálicos ou non metálicos que supoñan unha alteración do medio natural; que exploten minerais radioactivos; e aquelas cuxos minados estean a menos de un kilómetro de distancia de núcleos urbanos, que poidan inducir riscos por subsidencia.

As veciñas prevén que Recursos Minerales de Galicia (RMG) presenten novamente un proxecto de explotación para a primeira fase (Doade -Beariz) unha vez feitos os estudos hidroxeolóxicos para subsanar as deficiencias atopadas pola Confederación Hidrográfica, aínda que a concesión de explotación abarca unhas 1700 hectáreas dende Presqueiras (Forcarei) ata Rubillón (Avión). A veciñanza insiste en que o problema da probable contaminación e afectación ás augas non é só local, senón que se atopa nunha zona moi sensible por ser cabeceira de ríos e regatos que nacen nos montes e van desembocar nas bacías do Miño, Lérez e Verdugo chegando ás rías de Pontevedra e Vigo atravensando numerosos concellos.