Memoria histórica
A CRMH recorrerá a declaración de Meirás como Lugar de Memoria para reclamar que as vítimas sexan o eixo

A Comisión pola Recuperación da Memoria Histórica (CRMH) da Coruña recorrerá a declaración do Pazo de Meirás como Lugar de Memoria Histórica ao considerar que a resolución da Secretaría de Estado non fundamenta adecuadamente os motivos da declaración e deixa nun segundo plano ás vítimas da represión franquista.

A entidade memorialista anunciou a presentación dun recurso de reposición despois de estudar, xunto con outras organizacións, a argumentación empregada pola Secretaría de Estado. A CRMH lembra que foi precisamente unha das entidades que reclamou que o Pazo de Meirás recibise esta consideración.

O recurso defenderá que a declaración debe centrarse na represión exercida durante a ditadura e nas vulneracións de dereitos humanos sufridas polas súas vítimas. “Non estamos a falar dun plan de usos nin de aspectos culturais do Pazo de Meirás”, sinala a organización, que considera que a resolución debe atender exclusivamente, na súa xustificación, a “as vítimas, a represión e os atentados cometidos contra os dereitos humanos e a súa vulneración sistemática”.

Para a CRMH, Meirás constitúe un lugar de memoria pola súa relación coa represión franquista e o expolio, polo que non considera pertinente incorporar outros valores culturais ou literarios como elementos centrais da declaración.

Neste sentido, cuestiona especialmente a referencia á escritora Emilia Pardo Bazán incluída na resolución. A Comisión lembra que Pardo Bazán morreu en 1921, antes do golpe de Estado de 1936, e que, polo tanto, “non foi vítima do franquismo”. Ao seu xuízo, a súa figura non pode formar parte da fundamentación principal da declaración.

Ademais de reclamar que as vítimas da represión franquista constitúan o eixo da resolución, a CRMH pedirá recuperar a denominación de Pazo de Meirás, despois de que a palabra 'Pazo' desaparecese da declaración, algo que a organización cualifica de “sorprendente”.

O recurso solicitará así mesmo que se emenden varios erros que, segundo a entidade, contén a resolución en relación coa tipificación do expolio e o relato da represión. Tamén denunciará a “omisión absolutamente irregular” do papel desempeñado polas asociacións memorialistas que impulsaron a declaración.

A CRMH prevé presentar o recurso “proximamente” e conta co respaldo de diversas entidades, entre elas a Agrupación Cultural Alexandre Bóveda, a AAVV Atochas-Montealto-A Torre, a Asociación Veciñal da Agra do Orzán, a AC Eira Vella de Betanzos, a Agrupación Cultural O Galo de Santiago e a asociación viguesa Memoria, Verdade e Xustiza.

Tamén apoian a iniciativa o Comité pola Memoria Histórica do Val do Limia e o Comité de Memoria Histórica da Comarca de Celanova, ambos de Ourense, así como Vía Galega, Fundación Galiza Sempre, Fundación Moncho Reboiras e a CIG, ademais doutras organizacións memorialistas de fóra de Galiza.