Directiva da CRTVG: "É mentira dicir que chegamos tarde"

Cúmprense cinco días da xornada negra que arrasou unhas 35.000 hectáreas en Galiza e na que faleceron catro persoas. Na tarde do luns, milleiros de persoas saíron ás rúas das vilas e cidades galegas pedindo responsabilidades á Xunta pola súa xestión. Ademáis, tamén foron xeralizadas as críticas aos medios públicos galegos pola súa cobertura da traxedia do domingo. 

Vídeo do colectivo Lentes Diverxentes en protesta pola cobertura:Ante estas críticas, no mediodía do xoves, a dirección do departamento de Proxección Social da CRTVG enviou unha carta interna ao persoal, titulada Nós estivemos alí e asinada por Xaime Arias, director de Proxección Social desde o pasado mes de xuño.

Desde entón, este departamento pasou a integrarse na oficina do Director Xeral, Alfonso Sánchez Izquierdo. Cómpre destacar que este mesmo luns, empregadas e empregados da CRTVG e milleiros de persoas nas rúas, reclamaron a dimisión do Director Xeral do cargo. 

No texto dirixido ao persoal, afírmase que “é inxusto, inmoral e fundamentalmente mentira dicir que chegamos tarde” e reinvindica que a cobertura sobre os incendios comezou o venres, antes que no resto de canles.

A maior parte das críticas foron motivadas pola reacción durante a tarde do domingo. Con 125 lumes localizados e máis de unha ducia de incendios en situación 2, a TVG optou por emitir repeticións de programas de entretemento na primeira canle e retransmisións deportivas na TVG2. Malia a decisión de non emitir un especial informativo ata ben entrada a noite, a carta da Dirección de Proxección Social afirma que “os directivos, os coordinadores, os redactores estabamos alí tomando decisións nunha das maiores catástrofes da historia do país”. 

Reflexión, autocrítica e historia (2006 e 2017). A carta de @jaimearias11 sobre os medios públicos: “Nós estivemos alí”. pic.twitter.com/vdpvbYYTbO

— Kiko Novoa (@kikonovoa) 19 outubro 2017

Na comunicación interna, Xaime Arias fai unha comparación da cobertura da semana pasada coa cobertura durante o verán de 2006, cando o bipartito estaba no goberno. Recorda que nesa ocasión “tamén morreron 4 persoas, e a superficie queimada foi moito maior”. Sobre a cobertura do domingo, deféndese dicindo que “ninguén en Galicia fixo nunca un despregamento informativo como o que se fixo nos días pasados por mor dunha vaga de incendios”, concluindo que “moito se mellorou con respecto a 2006”. 

Ademáis de defenderse das críticas, a dirección di querer implementar un protocolo de breaking news e recoñecen que “temos moito traballo por facer”.

Reaccións ao comunicado

Fontes sindicais consultadas por O Salto Galiza manifestan que a nota interna “se valora por si mesma”. Ademáis, engaden que “lonxe de aplaudir o papel xogado polos profesionais que traballaron arreo o domingo, só vén incrementar máis a súa indignación”.