Laboral
A CIG reclama igualdade e o pago de horas extra ante as oficinas de Abanca en Lugo

Paula Mosqueira comezou a traballar hai vinte anos no que daquela era Caixa Galicia, hoxe Abanca. Na actualidade é subdirectora da oficina da Pobra de San Xillao. “A maior parte das mulleres que traballamos en Abanca, unha vez que temos unha certa idade, ou formamos unha familia, deixamos de ascender”, denuncia. “Como moito, quedas nun posto de subdirección”. Mosqueira participou o 21 de marzo, xunto a compañeiros e compañeiras da Conferencia Intersindical Galega-Abanca, nunha acción reivindicativa que percorreu os caixeiros da entidade bancaria en Lugo.

Igualdade e Conciliación

A Comisión de Igualdade da CIG-Abanca critica que tan só un 29% dos postos de dirección de entidades bancarias están cubertos por mulleres, fronte a un 71% de homes. “Temos un teito de cristal do que non pasamos, no cadro de persoal de Abanca estamos igualados en número de homes e de mulleres, incluso cunha leve maioría de mulleres, pero nós cubrimos os postos máis básicos, nos que a retribución salarial é menor”, explica Mosqueira. Se a comparación se realiza nun grao superior da escala xerárquica en Abanca a porcentaxe de mulleres diminúe aún máis: “o 93% dos xefes de zona son homes”. ”É unha discriminación total, pedimos que se nos trate igual á hora de ter unha carreira profesional”.

"As medidas de conciliación só existen no papel

As reivindicacións no eido da igualdade tamén se dirixen ás dificultades para conciliar. “As medidas de conciliación só existen no papel”, denuncia Mosqueira. Ela mesma ten unha redución de xornada, que en teoría lle permitiría conciliar logo de ter fillos. “A xornada media dun traballador en Abanca é de oito da mañá a dúas e media e de catro e media a sete da tarde. Eu non traballo polas tardes, mais as horas que non fago remátoas cubrindo durante a miña xornada laboral. Hai tardes ás que saio ás catro e media ou mesmo ás cinco. Estou renunciando a parte da miña retribución, pero ao final traballo case as mesmas horas”.

Horas extra e seguridade social

Outra das demandas da CIG-Abanca sinalan os obxectivos “desproporcionados” que reclama a empresa. “Isto obríganos a alongar as nosas horas de traballo, horas que non se nos retribúen, porque en Abanca non hai horas extra”. O sindicato reclama que os obxectivos se axusten ás xornadas de traballo, e que esas horas extra que hoxe son habituais se convertan en algo “excepcional, e polo que o traballador cotice e sexa remunerado”.

Alén da xornada laboral que transcorre no espazo da oficina, a CIG-Abanca reivindica o dereito á desconexión dos traballadores e traballadoras. “Os cadros de persoal das empresas reciben teléfonos, tablets e ordenadores persoais cos que poden traballar dende as súas casas; non estamos en contra destas tecnoloxías, mais queremos que se estableza que non poden ser empregadas de xeito que cando chegues á casa teñas que estar conectándote para facer cursos ou para responder correos”.

Dende a CIG-Abanca sinalan que as súas reivindicacións non son novas para a empresa. “A través da comisión de Igualdade temos trasladado continuamente esta problemática, todo isto xa o coñecen, pero non lles interesa poñer medios para solucionalo”, di Mosqueira. Por este motivo o sindicato continuará con accións de protesta en distintas cidades e vilas galegas ao longo dos vindeiros meses.