Laboral
A CIG, primeiro sindicato de Galiza, súmase á folga xeral que demanda o movemento pola vivenda

A Confederación Intersindical Galega (CIG) decidiu hoxe convocar folga xeral en Galiza en resposta á “insoportábel” suba dos prezos, que está afondando no empobrecemento da clase traballadora, e á falta de medidas dos gobernos para garantir unha vivenda digna.

A central sindical chama o conxunto do tecido social e sindical á mobilización e a que se faga efectiva a convocatoria de folga xeral na primeira semana de novembro. Con ela reclama medidas que garantan de xeito inmediato o dereito á vivenda, a intervención nos sectores estratéxicos, a suba do SMI, unha maior protección social e o reforzo dos servizos públicos.

Unha campaña con dez propostas

A decisión chega despois de que a CIG puxese en marcha a finais de setembro a campaña A suba dos prezos que a pague o capital. Queremos vivir dignamente, con dez propostas para que sexa o capital quen asuma as consecuencias da actual carestía da vida e en demanda dunha “vida digna” para a maioría social.

Dentro desta iniciativa, o sindicato esixe que tanto a Xunta de Galiza como o Goberno do Estado inclúan nos orzamentos de 2027 un Plan de Choque con medidas para frear o deterioro das condicións de vida da clase traballadora e garantir o acceso a unha vivenda digna.

“O medre constante e imparábel dos prezos da electricidade, dos combustíbeis, dos produtos de primeira necesidade e da vivenda está levando o pobo e as clases traballadoras á ruína; unha situación que empeora pola deterioración dos servizos públicos e o retroceso nas políticas sociais”, alertou o secretario xeral, Paulo Carril, no acto de presentación da campaña.

Críticas ao Goberno español

A CIG considera que as accións promovidas polo Goberno español en materia de vivenda e para conter a alza dos prezos, que ameaza con colapsar as economías das familias, son “tardías, escasas e insuficientes”. Fronte a isto, defende unha maior intervención pública nos prezos e nos mercados considerados básicos, así como o reforzo dos servizos públicos e das medidas de protección económica.

En canto á vivenda, aposta tamén pola intervención pública no mercado para limitar os prezos, evitar desafiuzamentos e aumentar a oferta de vivenda accesíbel, especialmente para as persoas con menos recursos.

Principais reivindicacións

En materia de alimentación, a CIG reclama prezos populares para os produtos básicos e prezos xustos para as persoas produtoras, ademais de medidas contra a especulación e contra determinadas empresas enerxéticas e do comercio alimentario.

No eido da vivenda, esixe a prohibición dos desafiuzamentos, a protección das persoas con dificultades para pagar o alugueiro ou a hipoteca e a conxelación tanto das rendas dos alugueiros como das subas dos xuros hipotecarios. Para a vivenda social, demanda a posta á disposición inmediata de persoas e colectivos necesitados das vivendas da SAREB, o establecemento de límites máximos aos alugueiros dos grandes propietarios e a creación dun Banco Galego de Vivenda destinado ao alugueiro social.

Na electricidade, propón crear unha empresa pública galega e unha Tarifa Eléctrica Galega, xunto con cambios no sistema de prezos e na composición da factura. Respecto dos combustíbeis, pide fixar un prezo máximo para a gasolina e o diésel mentres non se estabilicen os prezos.

Por último, en mobilidade, a central defende reforzar o transporte público con máis frecuencias, horarios máis amplos, maior acceso aos descontos e unha ampliación dos traxectos gratuítos.