Justicia
Xuristas de toda a Galiza denuncian o traslado forzoso de Villares e piden ao CGPJ que investigue posibles irregularidades

Un colectivo de xuristas galegos alzou a voz contra o que considera unha das decisións máis graves adoptadas nos últimos anos contra a independencia xudicial na Galiza. A Asociación Xustiza e Sociedade de Galiza denunciou publicamente o traslado forzoso de varios maxistrados da Sección 3ª do Tribunal Superior de Xustiza de Galiza (TSXG), entre eles o maxistrado Luís Villares, apartado dos asuntos de autorizacións eólicas, contratación administrativa e procedementos de especial transcendencia pública.

Os acordos, adoptados o 12 de marzo de 2026 pola nova Presidencia da Sala do Contencioso-Administrativo, terían sido tomados, segundo a asociación, sen criterios obxectivos aprobados pola Sala de Goberno —tal e como esixe o artigo 198.1 da Lei Orgánica do Poder Xudicial— e sen dar audiencia aos maxistrados afectados. Para os xuristas que asinan a denuncia, isto constitúe unha alteración irregular do funcionamento xurisdicional da Sección e unha posible vulneración das garantías constitucionais de independencia e inamovibilidade xudicial recollidas nos artigos 117 e 122 da Constitución Española.

Presións previas e ausencia de motivación

A Sección 3ª estivo sometida durante meses ao que a asociación describe como presións políticas, empresariais e mediáticas, ligadas ás súas resolucións en materia de proxectos eólicos e contratación pública. Para Xustiza e Sociedade de Galiza, a coincidencia temporal entre esas presións e os traslados, sumada á falta dunha motivación reforzada, xera a aparencia de que a reorganización podería responder a intereses alleos ao servizo público da xustiza. A entidade cualifica a situación de posible desviación de poder.

Segundo os denunciantes, as consecuencias son de enorme calado: desfaise unha unidade xudicial altamente especializada, apártanse maxistrados con experiencia acreditada en materias de grande complexidade técnica e ábrese a porta a que as presións externas condicionen, no futuro, a composición dos órganos xurisdiconais. “Isto é absolutamente incompatible cun Estado de Dereito sólido e digno de tal nome”, sinala a nota de prensa da organización.

Escrito ao TSXG e petición de investigación ao CGPJ

Ante a gravidade dos feitos, a asociación adoptou unha dobre vía de actuación. Por unha banda, remitiu un escrito formal á propia Sala do Contencioso-Administrativo do TSXG esixindo a revisión urxente dos acordos do 12 de marzo, a súa rectificación e a plena restauración dos principios de legalidade, motivación e transparencia.

Por outra, dirixiu unha comunicación ao Consello Xeral do Poder Xudicial (CGPJ) na que solicita a apertura dun expediente informativo, a suspensión cautelar dos traslados, a emisión dun informe oficial sobre a conformidade legal do procedemento e, no caso de confirmarse a existencia de irregularidades ou desviación de poder, a adopción de medidas correctoras ou disciplinarias.

Xustiza e Sociedade de Galiza instou a ambas as instancias a actuar “con contundencia, transparencia e responsabilidade”, protexendo os maxistrados afectados e garantindo que ningunha decisión interna poida interpretarse como unha interferencia na independencia xudicial. “A xustiza non pode quedar exposta a presións externas. A cidadanía merece institucións independentes e cribles”, conclúe a asociación.