Incendios
Vixilantes e emisoristas do servizo contra incendios esixen á Xunta que revise as súas categorías profesionais

O colectivo de vixilantes e emisoristas do Servizo de Prevención e Defensa contra Incendios Forestais (SPIF) esixe un recoñecemento profesional “acorde ás súas funcións, responsabilidades e evolución tecnolóxica”, ao entender que o seu actual encaixe laboral “non corresponde adecuadamente” coa “realidade” de as tarefas que desempeñan a diario.

Segundo explican nun comunicado, o labor dos vixilantes de caseta “vai moito máis alá” da “simple observación” desde unha torre, xa que inclúe a detección temperá de incendios, a localización e o aviso dos focos, o seguimento da súa evolución e tamén a vixilancia das condicións meteorolóxicas, entre outras funcións.

Os emisoristas-vixilantes, pola súa banda, encárganse de recibir, procesar e transmitir información, coordinar as comunicacións e apoiar a toma de decisións operativas. Para desempeñar estas tarefas empregan ferramentas e aplicacións tecnolóxicas incorporadas progresivamente ao servizo, ao tempo que asumen “o elevado nivel de estrés propio da xestión das emerxencias”.

O colectivo sostén que ao longo dos anos se produciron “importantes cambios” tanto nas funcións desempeñadas como nos medios empregados, pero que o recoñecemento profesional “non evolucionou” ao mesmo ritmo.

A súa principal demanda consiste en que a Xunta abra unha negociación específica sobre a clasificación profesional de vixilantes e emisoristas-vixilantes, atendendo ás funcións que realmente realizan, a responsabilidade que asumen, a cualificación que requiren e a evolución do propio sistema de prevención e defensa contra incendios.

No caso do persoal funcionario, reclaman que se estude o seu paso ao subgrupo C1; para o persoal laboral, piden revisar a súa clasificación actual e apostan polo grupo III como referencia de mellora.

O colectivo solicita ademais que se valore a aplicación de medidas de xubilación anticipada ou de coeficientes redutores para quen desenvolve actividades especialmente penosas, perigosas ou de alta exposición dentro do operativo de prevención e defensa contra incendios forestais.

“Non pedimos privilexios. Pedimos que se recoñeza profesionalmente o traballo que realmente facemos”, conclúe o colectivo no seu comunicado.