Incendios
O incendio forestal de Padrón arrasa xa preto de 300 hectáreas

O incendio forestal que afecta ao municipio de Padrón (A Coruña) queimou xa 250 hectáreas, o que levou á Consellería do Medio Rural a decretar a Situación 2, dado o risco que supón para dous núcleos de poboación da parroquia de Carcacía: Sobrerribas e Cruxeiras de Abaixo.

Este último núcleo foi evacuado na súa totalidade. O desaloxo tivo lugar a primeiras horas da tarde do sábado e, sobre as 20h, os seus habitantes aínda non puideran volver aos seus fogares. O alcalde do municipio explicou publicamente que as chamas traspasaron o termo municipal e esténdense xa por Teo, en dirección a Vilar do Bispo.

Desde a Xunta sinalouse que, durante a xornada, un dos frontes do lume volveu cobrar forza. O incendio iniciouse o venres ás 16.01 horas e, segundo os últimos datos facilitados ás 18.45 horas do sábado, suma xa 250 hectáreas calcinadas.

Xunto aos desaloxos, a Garda Civil trasladou ao 112 o corte de dúas estradas: a que une a parroquia de Carcacía con Padrón e a que conecta Vilar do Bispo con Lampai, xa en Teo.

Malia que pola mañá o incendio parecía encamiñarse cara ao seu control, o vento e as elevadas temperaturas dificultaron os traballos. As autoridades do municipio atópanse xunto aos efectivos de Medio Rural mentres se monta o Posto de Mando Avanzado. Sobre o terreo, as brigadas traballan para encauzar as chamas, evitar que sigan avanzando ou, polo menos, dirixilas cara a zonas onde causen menos danos.

A Consellería do Medio Rural sumou até o momento catro técnicos, 36 axentes, 47 brigadas, 33 motobombas, tres pas, sete unidades técnicas de apoio, oito helicópteros e sete avións ao operativo. A estes recursos súmase o apoio do Ministerio para a Transición Ecolóxica, que enviou dous avións anfibios e un helicóptero, coordinados cos medios autonómicos nas tarefas de extinción.