Historia
Anselmo López Carreira, a Galiza medieval e as primeiras institucións do autogoberno

No segundo capítulo do podcast, Anselmo López Carreira achega unha lectura precisa e documentada sobre quen foron realmente os Irmandiños e contra que estruturas de poder se levantaron. Historiador, ensaísta e referente nos estudos sobre a Galiza medieval, López Carreira pon o foco na organización política e social do século XV.

Na entrevista con David Gesteira analiza o papel da nobreza, da Igrexa e das institucións propias do país, así como a dimensión política da revolta, moitas veces reducida a un simple levantamento popular. O episodio afonda tamén no concepto de institucións de autogoberno na Galiza medieval e no significado fondo da revolta. 

Un capítulo clave para comprender a complexidade dun movemento que foi moito máis ca unha explosión de violencia contra os castelos. Esta entrevista non só resolverá dúbidas sobre o noso pasado como pobo, senón que porá luz sobre moitas ideas amplamente estendidas na opinión pública, pero non sempre moi exactas.

Verdades e mentiras da Revolta Irmandiña é o título que abarca unha narrativa transmedia que conta con dúas canles principais: a audiovisual, enfocado ás redes, e o podcast. Producido por O Salto, CRU e máis Descifrando a Historia, poderás atopar pílulas en vídeo nas redes que funcionan a modo de verificadores de feitos dalgunhas das ideas máis estendidas sobre este episodio no imaxinario popular.