Historia
Ana Rivera e o espazo roubado ás mulleres no preito Tabera - Fonseca

A historiadora Ana Rivera protagoniza o terceiro episodio de Verdades e mentiras da Revolta Irmandiña, cunha mirada necesaria sobre os silencios da historia. Investigadora especializada en historia, Rivera analiza o papel das mulleres nun contexto de conflito que tradicionalmente foi narrado en clave masculina. No preito Tabera - Fonseca, documento fundamental para entender a revolta, só hai unha muller como testemuña e iso ten un motivo.

Na conversa con David Gesteira aborda tanto a presenza feminina na sociedade galega do século XV como as razóns polas que a historiografía apenas deixou rastro delas nos relatos sobre a Revolta Irmandiña. O episodio reflexiona tamén sobre como se constrúe a memoria histórica e que consecuencias ten deixar fóra determinadas experiencias.

Un capítulo que amplía o foco e convida a repensar a Revolta Irmandiña desde unha perspectiva feminista e crítica.

Verdades e mentiras da Revolta Irmandiña é o título que abarca unha narrativa transmedia que conta con dúas canles principais: a audiovisual, enfocado ás redes, e o podcast. Producido por O Salto, CRU e máis Descifrando a Historia, poderás atopar pílulas en vídeo nas redes que funcionan a modo de verificadores de feitos dalgunhas das ideas máis estendidas sobre este episodio no imaxinario popular. 

Verdades e mentiras da Revolta Irmandiña está financiado con recursos públicos grazas ao certame Fondo de proxectos culturais Reino de Galicia, promovido pola Deputación da Coruña.