Educación
A Tribo do Milladoiro: cando a mocidade cambia a mirada para transformar o futuro

A mocidade do Milladoiro decidiu responder aos estereotipos coa mellor ferramenta que ten ao seu alcance: a súa propia voz. Ese é o espírito de A Tribo do Milladoiro, un proxecto de comunicación participativa impulsado por Agareso en colaboración co IES do Milladoiro, que converte un grupo de adolescentes en protagonistas dun relato alternativo sobre a súa comunidade.

Tras máis de seis meses de traballo, 24 mozos e mozas elaboraron curtametraxes, campañas de sensibilización e pezas audiovisuais nas que reflexionan sobre a diversidade, a convivencia, a identidade e os discursos de odio. O proceso foi moito máis alá da aprendizaxe técnica: significou un espazo para dialogar, coñecerse, cuestionar prexuízos e construír colectivamente unha mensaxe positiva sobre o lugar onde viven.

A iniciativa culmina agora coa campaña “Se cambias a mirada, verás o futuro”, protagonizada por once integrantes da Tribo. A través de retratos de gran formato e frases creadas polas propias rapazas e rapaces, a campaña invita á cidadanía a abandonar os tópicos que adoitan asociar barrios periféricos e diversidade cultural con conflito ou inseguridade. Pola contra, reivindica que a mestura de culturas, experiencias e identidades é unha fortaleza e unha oportunidade para construír unha sociedade máis cohesionada.

Mensaxes como “A periferia está chea de vida”, “Ser diferente non é malo” ou “A mestura está en todas nós” sintetizan unha idea sinxela pero poderosa: o futuro constrúese desde a convivencia e o respecto mutuo. A campaña propón cambiar o punto de vista, mirar máis alá dos prexuízos e escoitar directamente ás persoas novas, que reclaman ser recoñecidas non como un problema, senón como parte da solución.

O proxecto nace tamén dunha reflexión crítica sobre a imaxe pública do Milladoiro. Nas primeiras fases, centos de estudantes do instituto participaron en dinámicas para analizar como se representa a súa localidade nos medios de comunicación e cal é a percepción que existe sobre ela. As conclusións serviron como punto de partida para crear contidos que ofrecen unha visión máis plural, realista e esperanzadora da contorna.

A Tribo do Milladoiro tenta demostrar así o potencial da comunicación como ferramenta de transformación social. Ao poñer a cámara e o micrófono nas mans da mocidade, o proxecto non só combate estereotipos, senón que fortalece o sentimento de pertenza, fomenta o pensamento crítico e promove unha cidadanía máis participativa.