Educación
Ruídos, cheiros e falta de EPIs: o profesorado do CIFP Manuel Antonio denuncia a falta de seguridade nas obras do centro

O profesorado do CIFP Manuel Antonio, o maior centro de Formación Profesional de Galiza, leva desde o inicio do curso denunciando unha situación que cualifican de “insostible”. As obras de impermeabilización das cubertas coincidiron co inicio do curso e, segundo aseguran, están a desenvolverse sen cumprir as condicións mínimas de seguridade establecidas pola Lei de prevención de riscos laborais. O equipo docente insiste en que non se opón ás reformas, mais considera imprescindible que estas se realicen “con seguridade, planificación e respecto polas condicións de traballo e aprendizaxe”.

Profesorado, alumnado e persoal non docente —preto de 2.000 persoas— traballan entre ruídos por riba do permitido, caída de escombros, po en suspensión e fortes cheiros. A comunidade educativa alerta de que a situación está a afectar a saúde, a aprendizaxe e o normal desenvolvemento da docencia práctica. “Estamos oito horas todos os días expostas a poeiras, escombros, cheiros, alcatrán... Non sabemos ben a que estamos sometidas”, resume o profesorado.

Os problemas acumúlanse: aulas pechadas, materiais estragados e equipos de laboratorio danados polos cortes eléctricos provocados pola obra. Según afirman, segue a chover en moitos puntos do edificio e calculan perdas de miles de euros en equipamento especializado. Ademais, denuncian a presenza de residuos tóxicos, como tubos fluorescentes, abandonados sen sinalización nin control.

O profesorado asegura que segue sen acceso ao plan de prevención de riscos nin ao libro de obra, dous documentos básicos para coñecer o impacto real das intervencións. Explican que foi necesario recoller sinaturas para forzar a convocatoria dun claustro extraordinario, xa que a dirección non tiña previsto informar sobre a situación. Durante esa reunión, celebrada hai tres semanas, a dirección comprometeuse a solicitar o informe de riscos, pero desde entón non recibiron resposta.

Mentres tanto, docentes e alumnado permanecen cada día nas aulas expostos a po e fortes cheiros a alcatrán, sen saber que medidas de protección deberían adoptar. Segundo afirman, non se lles está a fornecer ningún tipo de EPI, malia que os operarios da obra si empregan máscaras.

O profesorado solicita á Consellería de Educación e á Unidade Técnica responsable da obra unha avaliación urxente da situación por parte dos servizos de prevención, a entrega de toda a documentación relativa a riscos laborais e información transparente e regular sobre o estado dos traballos e os prazos previstos.

Tamén reclaman un plan alternativo que garanta o desenvolvemento das clases prácticas, así como unha dotación económica extraordinaria para reparar o equipamento danado e depurar responsabilidades polos danos causados. “Non contamos cunha previsión de onde temos que dar as aulas ao día seguinte”, explican. “A redistribución das aulas estase a facer nun espazo moi pequeno onde as aulas non están habilitadas para grupos tan numerosos”.

O vindeiro martes, 4 de novembro, está convocada unha nova concentración na entrada principal do CIFP Manuel Antonio para reclamar condicións de seguridade mínimas e transparencia sobre o avance das obras.