Culturas
Vinte proxectos culturais galegos entre a memoria mariñeira e os videoxogos na lingua propia

Dende un documental sobre a memoria migrante nun barrio coruñés ata un videoxogo que satiriza o turismo, pasando por residencias artísticas para persoas con discapacidade ou a recuperación da historia dunha muller esquecida: vinte iniciativas culturais da provincia reparten entre si 90.000 euros despois de ser seleccionadas na segunda edición dos Premios a Proxectos Culturais Singulares para a Mellora Social.

Das 53 propostas presentadas, un xurado quedou coas vinte que, ao seu criterio, combinan mellor calidade técnica, orixinalidade e un impacto social real sobre a xente. As contías van dos 2.250 aos 6.750 euros, repartidas en catro categorías segundo a puntuación.

Memoria, territorio e comunidade

Entre os traballos mellor valorados están Memoria migrante en movemento, de Juan Pablo Rodríguez Santiago, centrado na Agra do Orzán da Coruña; A Rede do Mar, de AAntena, que recolle a memoria mariñeira da Costa da Morte; e VIVAS, as residencias artísticas para persoas con discapacidade impulsadas pola cooperativa Artefeito. Xúntanse a estes o programa de mediación CLIC, de Culturactiva, e a proposta sonora Rupestre Sonoro, de Noente Paradise.

Un segundo grupo de proxectos, con axudas de 5.250 euros, inclúe traballos tan diversos como Cintas de cores. Contos e música para a inclusión, de María Irene Quinteiro Blanco; Arquivos Vivos, de Carmen Purificación Ripamonti Mondelo, sobre patrimonio inmaterial; unha mirada á arquitectura popular en A arquitectura sen arquitectos, do Cebreiro a W 57th st, de Arraianos Producións; a peza escénica Somos os monstros, da compañía Berrobambán, sobre a comunidade xorda; e o documental Mulleres Barbanza Arousa, de Pablo Chouza López.

Patrimonio, educación e sátira

Cun apoio de 3.750 euros cada un figuran A Pedra que fala, de Martela Films, sobre petróglifos e accesibilidade visual; o programa educativo Círculos de comunidade na escola, da cooperativa Azul Mais Verde; o videolibro Vidas de vidro, de Promove Consultoría, sobre memoria LGTBI na terceira idade; a sátira audiovisual e videoxogo O noso pasar: A nosa fantasía, de Melgo Cinema; e o proxecto participativo Alcumes, da cooperativa xuvenil A Furna.

Pechan a lista cinco iniciativas con 2.250 euros de axuda: O Demo Game Jam, de Proxecto Espiga, arredor da creación de videoxogos en galego; Soños analóxicos, de Sinsal Audio, sobre creación sonora e patrimonio inmaterial; o proxecto transmedia Cerimonias, de Cru Producións; a curta documental Canguro, de Brava, sobre maternidade e prematuridade; e A vida borrada de Margot Sponer, de Aqueladas, unha recuperación audiovisual histórica.

O xurado, presidido pola deputada de Cultura, Natividade González, valorou sobre todo o impacto social real das propostas, ademais da solvencia dos equipos e a singularidade dos traballos presentados.