Altri
A denegación da subestación eléctrica deixa a celulosa de Altri pendente dun fío

O futuro da macrocelulosa de Altri e Greenalia en Palas de Rei (Lugo) acumula un novo buraco tras a negativa do Goberno español do PSOE e Sumar de autorizar a subestación e a conexión eléctrica que a empresa portuguesa reclamaba como condición indispensable para poñer en marcha a planta. A decisión, adiantada de xeito inusual na SER polo secretario xeral do PSdeG, José Ramón Gómez Besteiro, supón de facto a exclusión do proxecto da planificación eléctrica 2025-2030 e coloca á multinacional ante un escenario crítico: sen enerxía, non hai fábrica.

Besteiro falou dun “triplo non” do Executivo: sen axudas do Perte de descarbonización, sen fondos europeos extraordinarios de 250 millóns e agora sen acceso á rede eléctrica. Aínda que matizou que non facía un anuncio oficial, a reunión prevista entre Xunta e Ministerio este martes servirá para oficializar a decisión.

A resposta política non se fixo esperar. O BNG celebrou a noticia como unha vitoria social e ambiental. A súa portavoz nacional, Ana Pontón, deixouno claro: “Unha maioría social rexeita que nos coloquen unha bomba ambiental no corazón de Galiza”, e subliñou que o país “non necesita máis eucaliptos nin macrocelulosas, senón un monte ordenado e multifuncional”.

Na mesma liña, as plataformas veciñais Ulloa Viva e en Defensa da Ría de Arousa valoraron “moi positivamente” o anuncio, aínda que con cautela á espera da resolución definitiva. Os seus portavoces recordaron que a clave estará na redacción dos argumentos socioeconómicos e medioambientais, dos que dependerá a solidez xurídica da decisión e a eventual capacidade de recurso por parte da empresa.

Fronte ao aplauso ecoloxista e nacionalista, a Xunta acusou ao Goberno de “politizar” un asunto que, segundo insiste, debería resolverse con criterios técnicos. A decisión de colocar a macrocelulosa no corazón de Galiza non foi, con todo, técnica, senón política e empresarial.

O presidente Alfonso Rueda reprochoullle que fose Besteiro, “un deputado do terceiro partido en Galicia”, quen revelase a exclusión de Altri antes de que o Executivo central notificase oficialmente á administración autonómica.

O pulso entre Moncloa, Xunta, oposición e movementos sociais mantén aberto o debate sobre o modelo industrial e forestal en Galiza. Mentres Altri contempla que facer cun proxecto que perde osíxeno por minutos, a pregunta de fondo é se Galiza debe apostar por grandes factorías de celulosa dependentes do eucalipto ou, como reclaman cada vez máis voces, por alternativas de menor impacto ambiental e maior diversificación económica.