Altri
A concesión de augas da Xunta a Altri chega aos tribunais: comeza a guerra xudicial contra a celulosa

O conflito pola solicitude de concesión de augas da multinacional Altri ao seu proxecto de celulosa dá unha nova volta. A Asociación para a Defensa Ecolóxica de Galiza (Adega) e a Plataforma en Defensa da Ría de Arousa (PDRA) anunciaron a interposición dun recurso contencioso-administrativo contra a denegación do recurso de alzada que pedía o arquivo do expediente de concesión. En paralelo, a Confederación Intersindical Galega (CIG) presentou unha demanda propia polo mesmo motivo.

As tres organizacións denuncian que a Xunta de Galiza desoíu as miles de alegacións cidadás contra a concesión e permitiu que o procedemento se prolongase alén do prazo legal. Segundo o Regulamento do Dominio Público Hidráulico, a administración dispón dun máximo de 18 meses para resolver solicitudes deste tipo. No caso de Altri, que aspira a captar 46.000 metros cúbicos de auga diarios, o prazo tería expirado o 30 de maio de 2024, tras publicarse o anuncio inicial no BOP da Coruña en novembro de 2022.

En febreiro deste ano, as entidades solicitaron á directora de Augas de Galicia que declarase a caducidade do expediente. Ao non recibir resposta en tres meses, acudiron a un recurso de alzada, que foi desestimado o pasado un de agosto pola presidenta do organismo autonómico. A resolución sostén que a superación do prazo permite considerar a solicitude desestimada, pero non obriga a arquivar o expediente, o que abre a porta a que a concesión poida aprobarse fóra de prazo.

Adega, PDRA e CIG rexeitan este criterio, ao que acusan de xerar inseguridade xurídica e de prexudicar o interese público. Argumentan que a auga solicitada debería destinarse a fins ambientais e de abastecemento, no canto de á produción industrial da pasteira.

O Servizo de Tramitación de Concesións xustificou a demora na “complexidade do procedemento”, alegando que isto non ocasiona prexuízo a terceiros. Porén, os colectivos aseguran que a propia cidadanía, con miles de alegacións presentadas, é a directamente afectada. Con estas accións legais, o pulso social e xudicial contra o proxecto de Altri en Galicia entra nunha fase decisiva que se suma ao revés recibido hai apenas uns días por parte do Ministerio de Industria denegándolle a subestación eléctrica que esixía a empresa e a Xunta.